Dárethana shuńqyryna bir úıdiń 3 adamy túsip ketti: Polıtsııa oqıǵanyń qalaı bolǵanyn aıtty
ALMATY. QazAqparat - Almatyda dárethana shuńqyryna bir úıdiń úsh adamy túsip mert boldy. Polıtseıler oqıǵanyń qalaı bolǵanyn aıtyp berdi, dep habarlaıdy QazAqparat tilshisi.
Almaty qalalyq Polıtsııa departamenti málimetinshe, patrýldik polıtsııanyń eki ekıpajy dabyldy qońyraýǵa dereý jaýap berdi. Bul 30 maýsym keshki saǵat segiz de boldy.
«Kezekshi jedel ýákilden qońyraý túskennen keıin birneshe mınýttan soń biz oqıǵa ornynda boldyq. Syrttaǵy dárethanaǵa birneshe adamnyń qulap ketkeni týraly aqparat aldyq. Dárethananyń syrtyn alyp tastap, shuńqyrǵa baspaldaq túsirdik. Birinshi bolyp tómenge polıtsııa kapıtany Murat Kákibekov tústi. Biz baspaldaq pen onyń qolynan qatty ustadyq. Tereńdigi shamamen 3 metr. Murat er adamnyń qolynan ustap úlgerdi. Ony shyǵaryp aldyq. Kapıtan Kákibekovti birden polıtsııa aǵa leıtenanty Madııar Tólembaev aýystyrdy. Ol bir jasar qyzdy taýyp, syrtqa shyǵardy. Ókinishke oraı, bala qaıtys boldy. Osy kezde qutqarýshylar keldi. Olar 56 jastaǵy áıel men 12 jasar balanyń denesin shyǵarý úshin arnaıy quraldardy qoldandy. Otbasy úshin aýyr, orny tolmas qaıǵy», - dedi, patrýldik polıtsııa Polkiniń vzvod komandıri Asyl Razbek.
Qutqarylǵan er adam, jedel járdemge tapsyrylyp, shuǵyl aýrýhanaǵa jetkizildi.
«Qaıǵyly jaǵdaıdy anyqtaý barysynda, keshke úıdiń aýlasynda oınap júrgen bir jasar qyzdyń baıqaýsyzda kóshedegi dárethanaǵa túsip ketkeni anyqtaldy. Muny kórgen onyń 1955 jyly týǵan ájesi men 12 jasar aǵasy kómekke júgirip keldi, olar sábıdi shyǵarǵysy keldi, biraq olar da shuńqyrǵa túsip ketti. Sodan keıin balalardyń ákesi kómekke keldi - 1980 jyly týǵan K.esimdi azamat. Dárethana shuńqyryna túsip ketken balalary men anasyn sol jerden shyǵarýǵa tyrysqan. Alaıda, ol da esinen tanyp qaldy», - dedi, Naýryzbaı aýdandyq polıtsııa basqarmasynyń bastyǵy, polıtsııa podpolkovnıgi Dıdar Ahanov.
Eske salaıyq, qaıǵyly oqıǵa 30 maýsym kúni Naýryzbaı aýdanyna qarasty Abaı aýylynda bolǵan. Dárethana tesigine túsip ketken 1 jasar qyzdy qutqaramyn dep shuńqyrǵa aldymen 12 jasar aǵasy, artynan ákesi, sosyn ájesi túsken. Qutqarýshylar tek otaǵasyn aman alyp qala aldy.
