Daraqylyq pen dańǵazalyq: depýtat elimizdegi mektep bitirý keshterin synǵa aldy
ASTANA.KAZINFORM – Mektep bitirý is-sharalaryn ótkizýdiń biryńǵaı tárbıelik standartyn ázirleý kerek. Bul jóninde Parlament Májilisinde depýtat Jarqynbek Amantaıuly QR Premer-Mınıstriniń orynbasary – Mádenıet jáne aqparat mınıstri Aıda Balaevaǵa joldaǵan depýtattyq saýalynda málimdedi.
– Elimizdiń barlyq mektepterinde sońǵy qońyraý soǵylyp, 2025-2026 oqý jyly aıaqtaldy. Bıyl 3,9 mıllıonnan astam oqýshy oqý jylyn támamdasa, onyń ishinde 215 myńnan astamy mektep bitirýshi túlek atandy. Mektep bitirý – ár azamattyń ómirindegi mańyzdy beles. Bul kún eń aldymen bilimge qurmettiń, ustaz eńbegin baǵalaýdyń jáne jańa ómirge qadam basýdyń sımvoly bolýy tıis edi. Alaıda sońǵy jyldary mektep bitirý rásimi tárbıelik mazmunynan alystap, áleýmettik básekeniń, daraqylyqtyń jáne orynsyz dańǵazalyqtyń kórinisine aınalyp bara jatqany qoǵamdy alańdatyp otyr, – dedi ol.
Depýtattyń sózinshe, bıylǵy sońǵy qońyraý kezinde elimizdiń birneshe óńirinde qymbat avtokólikten quralǵan kortejder uıymdastyrylyp, jol qozǵalysy erejesi óreskel buzyldy.
– Almaty qalasynda mektep túlekteriniń avtokortejine baılanysty 21 kámeletke tolmaǵan balanyń ata-anasy jaýapkershilikke tartyldy. Al Mańǵystaý oblysynda túlekterdiń qymbat kóliktermen sherý ótkizip, áleýmettik jelide sán-saltanatty nasıhattaǵan vıdeo keńinen tarady, – dedi ol.
Alaıda másele tek avtokortejdermen shektelmeıdi. Bıyl qoǵamda erekshe talqylanǵan taǵy bir qubylys – mektep bitirýshi túlekterge arnalǵan alyp gúl shoqtarynyń jarysy boldy.
– Áleýmettik jelide júzdegen gúlden quralǵan kompozıtsııalar, qymbat syılyqtar men saltanatty rásimder qalypty jaǵdaı retinde kórsetildi. Ókinishke qaraı, mundaı báseke kóptegen otbasyǵa aýyr psıhologııalyq jáne qarjylyq qysym túsirgeni anyq. Keıbir ata-analar balasynyń qatarynan qalmaýy úshin qaryz alýǵa, bólip tóleýge gúl nemese syılyq alýǵa májbúr bolǵanyn ashyq aıtylyp jatyr. Bul jaǵdaı áleýmettik jaǵdaıy tómen otbasynyń balalary arasynda psıhologııalyq turǵyda ońaı bolmaıtyny belgili. Biz balalarǵa bilim men eńbektiń qundylyǵyn emes, qymbat kólik pen qymbat gúl arqyly mártebe kórsetýdi nasıhattap jatqan joqpyz ba? – dedi Jarqynbek Amantaıuly.
Sonymen birge, ol mektep bitirý rásimi álemdik tájirıbede qalaı atqarylatynyna toqtaldy.
– Memleket basshysy Ádiletti Qazaqstan qurýdyń basty qaǵıdatynyń biri retinde Zań men tártipti, adal eńbek pen qarapaıymdylyq mádenıetin qalyptastyrý qajettigin birneshe ret atap ótti. Al mektep qabyrǵasyndaǵy mundaı kórinister jas urpaqtyń sanasynda tutynýshylyq psıhologııany, jalǵan bedel men syrtqy áserge tabynýdy qalyptastyrýy múmkin. Álemdik tájirıbege nazar aýdarsaq, damyǵan elderde mektep bitirý rásimi tárbıelik mazmunǵa qurylǵan. Negizgi nazar oqýshynyń jetistigine, qoǵamdyq belsendiligine jáne bolashaq maqsatyna aýdarylady. Al materıaldyq jarys bilim berý júıesiniń qundylyǵyna qaıshy keledi, – dedi depýtat.
Osyǵan baılanysty ol Úkimetten mektep bitirý is-sharalaryn ótkizýdiń biryńǵaı tárbıelik standartyn ázirleýdi surady.
Sonymen qatar sońǵy qońyraý men mektep bitirý keshterinde orynsyz sán-saltanatqa, avtokortejderge jáne qoǵamdyq qaýipsizdikke qater tóndiretin áreketterge jol bermeý boıynsha naqty tetik engizýdi, bilim berý uıymdarynda áleýmettik básekeni emes, teń múmkindikter men rýhanı qundylyqtardy dáripteıtin túsindirý jumystaryn kúsheıtýdi, Oqý-aǵartý mınıstrligi tarapynan mektep bitirý mádenıetin qalyptastyrý jónindegi ulttyq tujyrymdamalyq usynystar ázirleý máselesin kóterdi.
Aıta keteıik, buǵan deıin meıramhanalarda mektep bitirý keshterin uıymdastyrýǵa tyıym salynǵanyn jazǵanbyz.
