«Daraboz dástúr» jyr músháırasy jarııalandy

ASTANA. QazAqparat - Qazaqstan Respýblıkasy Ulttyq sport túrleri qaýymdastyǵy Táýelsizdik kúni qarsańynda 2014 jylǵy ulttyq sporttyń úzdikterin marapattaýǵa arnalǵan «Altyn tuǵyr» sharasyn ótkizedi. Atalǵan is-shara aıasynda jas aqyndar arasynda ulttyq sportty nasıhattaıtyn músháıra uıymdastyrylyp otyr, dep habarlaıdy atalmysh qaýymdastyqtyń baspasóz qyzmetinen.

Músháıraǵa jasy 35-ke deıingi jazba aqyndar qatysa alady. Aqyndar onda ulttyq sporttyń kez kelgen túrin sıpattaǵan, ıaǵnı, báıge, aýdaryspaq, kókpar, teńge ilý, qyz qýý, jamby atý, asyq atý, toǵyzqumalaq sekildi ulttyq oıyndar jaıly buryn eshqaıda jarııalanbaǵan jyrlaryn usyna alady.

Baıqaýdyń maqsaty - ulttyq sport túrlerin nasıhattaý arqyly jastardyń dástúrli ónerge degen súıispenshiligin arttyrý, ulttyq rýhty bıiktetý, jastardyń poezııaǵa degen qushtarlyǵyn arttyryp, olarǵa qoldaý kórsetý jáne áli tanyla qoımaǵan aqyndardy, ásirese, jas daryndardy anyqtaý.

Baıqaý eki óleńnen turady. Onyń alǵashqysy - «Daraboz dástúr» óleńinde halqymyzdyń kóneden kele jatqan parasatty salt-dástúri, ulttyq qundylyqtar men ulttyq sport túrleri jyrǵa ózek bolýy tıis. Al ekinshi óleń - erkin taqyrypta.

Bas júldege - 150 000 teńge, І orynǵa 100 000 teńge, al ekinshi jáne úshinshi oryndar úshin sáıkesinshe 70 000 teńge men 50 000 teńgeden tigilip otyr. Baıqaýǵa qatysatyn óleńder 2014 jylǵy 10 jeltoqsanǵa deıin qabyldanady.