Dári satyp alǵanda neni tekserý kerek
ASTANA. KAZINFORM — Qazaqstandyqtarǵa dárilik zattardy qaýipsiz satyp alý, olardyń túpnusqalyǵyn tekserý jáne qandaı jaǵdaıda preparattardy memleket tegin beretini túsindirildi.
Densaýlyq saqtaý mınıstrligi dári-dármek satyp alar aldynda birneshe mańyzdy jaıtqa nazar aýdarýdy usyndy.
Eń áýeli, preparattyń Qazaqstanda resmı tirkelgenin tekserý qajet. Sonymen qatar qaptamasy bútin, jaramdylyq merzimi ótpegen jáne dári belgilengen saqtaý talaptaryna saı saqtalǵan bolýǵa tıis.
Qaptamada dárilik zattyń ataýy, dozasy, dárilik túri jáne tıisti tańbalanýy kórsetilýi kerek. Al medıtsınalyq qoldaný jónindegi nusqaýlyq qazaq jáne orys tilderinde qoljetimdi bolýǵa tıis.
Dáriniń túpnusqalyǵyn qalaı tekserýge bolady?
Preparattyń Qazaqstanda tirkelgenin Memlekettik dárilik zattar tiziliminen — register.ndda.kz arqyly tekserýge bolady.
Al dáriniń túpnusqalyǵyn jáne tańbalaý júıesindegi mártebesin DariKz jáne Naqty Onim mobıldi qosymshalary arqyly qosymsha tekserýge múmkindik bar.
Mınıstrlik dári-dármekti tek ony satýǵa zańdy quqyǵy bar dárihanalardan jáne tıisti saýda oryndarynan satyp alýǵa úndedi. Áleýmettik jelilerdegi paraqshalardan, habarlandyrýlardan nemese belgisiz ınternet-saıttardan dári satyp alǵanda asa saq bolǵan jón.
Eske salaıyq, buǵan deıin otandyq dári-dármek óndirisi 37%-ǵa artqanyn jazǵanbyz.
