Dári-dármekter men medıtsınalyq qyzmetterdiń keıbiri qosymsha qun salyǵynan bosatyldy
ASTANA. KAZINFORM - Qazaqstanda tegin medıtsınalyq kómektiń kepildik berilgen kólemi (TMKKK) jáne mindetti áleýmettik medıtsınalyq saqtandyrý (MÁMS) sheńberinde usynylatyn medıtsınalyq qyzmetter men dárilik preparattar qosylǵan qun salyǵyn (QQS) tóleýden bosatyldy.
QR Densaýlyq saqtaý mınıstrligi baspasóz qyzmetiniń habarlaýynsha, tıisti sharalar dárilik zattardyń 3000-nan astam ataýyn qamtıdy, onyń 1 200 ataýy orfandyq jáne áleýmettik máni bar aýrýlardy emdeýge arnalǵan, sondaı-aq kóterme jáne bólshek saýdada satý kezinde QQS-tan bosatylýǵa jatady.
Sondaı-aq sırek jáne áleýmettik máni bar aýrýlardy emdeý, dıagnostıkalaý, aldyn alý jáne ońaltý boıynsha medıtsınalyq qyzmetterge QQS salynbaıdy.
Qosymsha qosylǵan qun salyǵynan TMKKK jáne MÁMS sheńberinde dárilik zattardy óndirý úshin paıdalanylatyn ımporttalatyn farmatsevtıkalyq sýbstantsııalar bosatylady.
Atalǵan sharalar 2025 jylǵy 31 jeltoqsanda qabyldanǵan «Densaýlyq saqtaý salasyndaǵy qosylǵan qun salyǵynan bosatýdyń keıbir máseleleri týraly» Qazaqstan Respýblıkasy Úkimetiniń № 1203 qaýlysymen bekitilgen jáne 2026 jylǵy qańtardan bastap kúshine enetin Qazaqstan Respýblıkasynyń jańa Salyq kodeksi sheńberinde iske asyrylady.
Qabyldanǵan sheshim patsıentterdi qoldaýǵa jáne medıtsınalyq kómektiń qoljetimdiligin arttyrýǵa, sondaı-aq medıtsınalyq uıymdarǵa qarjylyq júktemeni azaıtýǵa jáne otandyq farmatsevtıka salasyn damytý úshin qolaıly jaǵdaılar jasaýǵa baǵyttalǵan.
Budan basqa, jańa Salyq kodeksine sáıkes kóterme jáne bólshek saýda segmentterinde dárilik zattar men medıtsınalyq buıymdardy ótkizý kezinde QQS tómendetilgen mólsherlemesin qoldaný kózdelgen. 2026 jylǵy qańtardan bastap QQS mólsherlemesi 5 %-dy, al 2027 jylǵy 1 qańtardan bastap — 10%-dy quraıdy.
Sonymen bir mezgilde Densaýlyq saqtaý mınıstrligi Qazaqstan Respýblıkasynyń básekelestikti qorǵaý jáne damytý agenttigimen birlesip retseptilik dárilik zattardy retteý merzimin 2027 jylǵy 1 qańtarǵa deıin uzartý týraly sheshim qabyldady.
Osy sharalardy iske asyrý densaýlyq saqtaý júıesin jetildirý jáne halyqty áleýmettik qorǵaýdy nyǵaıtý jónindegi keshendi memlekettik saıasattyń bóligi bolyp tabylady.
Ótken jyldyń ortasynda Densaýlyq saqtaý mınıstrligi bólshek saýda jelisindegi dárilik zattarǵa shekti baǵalardy retteý tetigin engizgenin esterińizge sala keteıik. Nátıjesinde búginde 3 780 ataý boıynsha dárilik preparattardyń baǵasy orta eseppen 26 %-ǵa tómendegeni tirkeldi.
- 2025 jyly shekti baǵany buzýdyń 28 faktisi anyqtalyp, jalpy somasy 5,7 mln teńgege ákimshilik quqyqbuzýshylyq týraly hattamalar jasaldy. Dárihanaǵa barǵan kezde dárilik zattardyń ózekti baǵalaryn Dari.kz mobıldik qosymshasy arqyly tekserýge bolady, - delingen QR Densaýlyq saqtaý mınıstrliginiń baspasóz qyzmeti taratqan aqparatta.
Aıta keteıik, Qazaqstanda ómirlik mańyzy bar dári-dármekterdiń 37%-y óndiriledi.