Dári-dármekten synama alý ókilettigi memlekettik organǵa beriledi
ASTANA. KAZINFORM – Qazaqstanda dárilik zattar men medıtsınalyq buıymdardyń sapasyn baqylaý tártibin ózgertý usynyldy. QR Densaýlyq saqtaý mınıstrligi tıisti buıryq jobasyn ázirledi.
Qujat 2026 jylǵy shildede zańnamaǵa engizilgen ózgeristerge baılanysty ázirlengen.
Jobaǵa sáıkes, sapasyn keıinnen tekserý úshin naryqtaǵy dárilik zattar men medıtsınalyq buıymdardan synama alý ókilettigin memlekettik organǵa berý josparlanyp otyr.
Qazir synama alýǵa qatysty talaptar Dárilik zattar men medıtsınalyq buıymdardyń sapasyna baǵalaý júrgizý qaǵıdalarynda qamtylǵan.
Mınıstrlik bul normalardy atalǵan qaǵıdalardan alyp tastaýdy usynyp otyr. Sebebi aldaǵy ýaqytta synama alý tártibi jeke qaǵıdalarmen retteledi.
Dárilik zattar men medıtsınalyq buıymdardan synama alý kezinde táýekelge baǵdarlanǵan tásil eskeriledi.
Mınıstrliktiń túsindirýinshe, ózgerister memlekettik saraptama uıymy men memlekettik organnyń ókilettikterin ajyratyp, olardyń qyzmetiniń qaıtalanýyna jol bermeýge múmkindik beredi.
Jańa tártip dárilik zattar men medıtsınalyq buıymdardyń aınalymyn memlekettik baqylaýdyń tıimdiligin arttyrady dep kútilip otyr. Ózgerister bıznes pen halyqqa qosymsha qarjylyq nemese ákimshilik júkteme túsirmeıdi.
Qujat «Ashyq NQA» portalynda 15 qyrkúıekke deıin qoǵamdyq talqylaýǵa shyǵarylǵan.
Buǵan deıin Qazaqstanda azamattarǵa tegin dári-dármekpen qamtamasyz etý týraly aqparatty jedel alýǵa múmkindik beretin chat-bot iske qosylǵan edi.
