Dári-dármekti saraptaý ulttyq ortalyǵynyń qyzmetine tekseris júredi

ASTANA. KAZINFORM — Básekelestikti qorǵaý jáne damytý agenttigi dári-dármek naryǵyndaǵy básekelestik jaǵdaıǵa taldaý júrgizdi.

Agenttik taldaý nátıjesinde dári-dármekti saraptaý ulttyq ortalyǵynyń monopolııalyq áreketin anyqtady. Aqparatta aıtylǵandaı, atalǵan ortalyq eldegi dári-dármekti saraptap, qyzmet kórsetetin jalǵyz uıym, ıaǵnı tolyq naryqqa ıe.

— Taldaý barysynda ınspektsııalaý qyzmetine arnalǵan tarıfti ortalyqtyń derbes bekitetini belgili boldy. Bul jaǵdaı tarıf saıasatynyń obektıvtiligine kásipkerler tarapynan kúmán týǵyzyp, baǵanyń negizsiz qymbattaýyna alyp kelý qaýpin týdyrady. Máselen, taldaý nátıjesinde bir ınspektsııalyq qyzmet tarıfiniń 6 ese óskeni anyqtaldy, bul dári-dármektiń túpkilikti baǵasyna áser etedi. Sebebi óndirýshiler men jetkizýshiler ilespe shyǵyndy shekti baǵaǵa engizedi, al ony keıin memleket pen halyq tóleıdi, — delingen resmı habarlamada.

Osyǵan baılanysty monopolııaǵa qarsy organ dári-dármekti saraptaý ulttyq ortalyǵynyń ústemdigine qatysty qyzmettik tekserý júrgizedi.

— Sonymen qatar, ınspektsııalyq qyzmetti memlekettik monopolııaǵa jatqyzý máselesi qaralady. Bul bolashaqta tarıfti retteýge múmkindik beredi, — dep habarlaıdy Básekelestikti qorǵaý jáne damytý agenttigi.

Eske salaıyq, jyl basynda Básekelestikti qorǵaý jáne damytý agenttiginiń tóraǵasy Prezıdentke esep berdi. 

Sondaı-aq Kazinform tilshisi osy kóktemde eldegi dári-dármek baǵasynyń ózgerýine qatysty sholý jasaǵan edi.