Dári-dármekti retseptisiz satý máselesi rettelmeı tur
ASTANA. KAZINFORM — Sońǵy 2 jylda dári-dári dármekti retseptisiz satý boıynsha 204 derek tirkelgen. Al jyl basynan beri dál osyndaı 6 zańbuzýshylyq anyqtalypty. Bul týraly QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti habarlady.
— 2023 jyly retseptisiz dári-dármek satý boıynsha 100 ákimshilik quqyq buzýshylyq faktisi tirkelse, 2024 jyly bul kórsetkish 104-ke jetken. Qazaqstan Respýblıkasynyń «Ákimshilik quqyq buzýshylyq týraly» Kodeksiniń 426-babynyń 1-bóligine sáıkes ákimshilik quqyq buzýshylyq týraly ister jónindegi hattama jasaldy, — deıdi Medıtsınalyq jáne farmatsevtıkalyq baqylaý komıteti.
Sondaı-aq komıtet qyzmetkerleri dári-dármekti retseptisiz bosatqandar qandaı jaza arqalaıtynyn da aıtyp berdi.
— Dárilik zattardy, medıtsınalyq buıymdardy tirkeý jáne qaıta tirkeý, óndirý, daıyndaý jáne olardyń sapasyn baqylaý, synaý, ákelý, satyp alý, tasymaldaý, saqtaý, tańbalaý, dárilik zattarǵa belgilengen shekti baǵalardy asyryp jiberýdi qosa alǵanda, ótkizý qaǵıdalaryn, sondaı-aq qoldaný, qamtamasyz etý, joıý, jarnamalaý qaǵıdalaryn buzý, eger bul adamnyń densaýlyǵyna zııan keltirýge alyp kelmese, — jeke tulǵalarǵa — 70, laýazymdy adamdarǵa — 100, shaǵyn kásipkerlik sýbektilerine — 130, orta kásipkerlik sýbektilerine — 200, iri kásipkerlik sýbektilerine 1000 aılyq eseptik kórsetkish mólsherinde aıyppul salynady, — deıdi mınıstrlik.
Vedomstvo mamandary atalǵan zańbuzýshylyqtyń kýási bolǵan turǵyndar eOtinish birińǵaı platformasy arqyly habarlaı alatynyn aıtady. Eger shaǵymda naqty dálelder bolsa, jaýaptylar birden tekseris jumystaryna kirisedi.
Eske sala keteıik, ótken joly jemqorlyqtyń aldyn alý úshin tegin dári-dármekterdi berý júıesine ózgeris engiziletinin jazǵan edik.