Dári-dármekke QQS: Qazaqstanda biryńǵaı 5 paıyzdyq mólsherleme usynyldy
ASTANA. KAZINFORM — Salyq kodeksin engizý jónindegi jobalyq keńsede dárilik zattarǵa, medıtsınalyq buıymdar men qyzmetterge salynatyn QQS mólsherlemesi talqylandy, dep habarlaıdy Úkimettiń baspasóz qyzmeti.
Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken Salyq kodeksin engizý jobalyq keńsesiniń 24-otyrysynda densaýlyq saqtaý salasynda QQS qoldaný máselesi qaıta qaraldy.
Jańa Salyq kodeksinde densaýlyq saqtaýdyń jekelegen baǵyttary úshin QQS mólsherlemesin kezeń-kezeńimen ózgertý kózdelgen. Bul rette tegin medıtsınalyq kómektiń kepildik berilgen kólemi (TMKKK) jáne mindetti áleýmettik medıtsınalyq saqtandyrý (MÁMS) sheńberinde usynylatyn medıtsınalyq qyzmetter men dárilik zattar QQS-tan bosatyldy. Bul dárilik zattardyń 3 myńnan asa túri.
Sondaı-aq sırek jáne áleýmettik mańyzy bar aýrýlardy emdeý, dıagnostıkalaý, aldyn alý jáne ońaltý boıynsha medıtsınalyq qyzmetterge QQS salynbaıdy. Qosymsha TMKKK jáne MÁMS sheńberinde dárilik zattardy óndirý úshin paıdalanylatyn farmatsevtıkalyq sýbstantsııalardyń ımporty salyqtan bosatyldy.
Kóterme jáne bólshek saýda segmentterinde dárilik zattar men medıtsınalyq buıymdardy ótkizý úshin QQS tómendetilgen mólsherlemesi kózdelgen: 2026 jylǵy qańtardan bastap ol 5%, 2027 jylǵy 1 qańtardan bastap — 10% bolady.
Sonymen qatar ártúrli QQS stavkalaryn qoldaný ákimshilendirý kezinde qıyndyqtar da týǵyzady. Densaýlyq saqtaý salasynyń ókilderi dárilik zattar men medıtsınalyq buıymdarǵa QQS biryńǵaı ótpeli mólsherlemesin engizý týraly máseleni birneshe ret kótergen.
«Atameken» UKP-nyń túrli nusqalaryn qarastyrǵannan keıin, salanyń atynan barlyq dárilik zattar men medıtsınalyq buıymdarǵa QQS-tyń biryńǵaı ótpeli mólsherlemesin 5% mólsherinde belgileýdi, al medıtsınalyq qyzmetterdi QQS-tan bosatýdy usyndy. «Atameken» UKP basqarma tóraǵasy Qanat Sharlapaev mysal retinde EYDU elderiniń tájirıbesin keltirdi. Olardyń basym kópshiliginde medıtsınalyq qyzmetterge QQS — 0%.
Otyrys barysynda sondaı-aq, tájirıbe kórsetkendeı, onyń ishinde pandemııa kezinde salyqtan bosatý satylatyn qyzmetterdiń, dárilik qyzmetter men medıtsınalyq buıymdardyń baǵasyna áser etpeıtini atap ótildi. Osyǵan baılanysty densaýlyq saqtaý salasyndaǵy QQS mólsherlemelerin yqtımal qaıta qaraý bıýdjetke, salaǵa, sondaı-aq halyq úshin medıtsınalyq kómek pen dárilik zattarǵa qol jetkizýge áser etetinin eskere otyryp, jan-jaqty taldaýdy talap etedi.
Talqylaý qorytyndysynda qatysýshylar densaýlyq saqtaý salasy men bıýdjet úshin usynylatyn ózgeristerdiń yqtımal saldaryn egjeı-tegjeıli taldaǵannan keıin, máselege qaıta oralýǵa kelisti.
Otyrystaǵy taǵy bir másele — Salyq kodeksiniń 778-baby. Ol 2027 jylǵy 1 qańtardan bastap, salyqtyq manevr sheńberinde paıdaly qazbalardy óndirýge salynatyn salyqtyń jańa stavkasyn engizýdi kózdeıdi.
Energetıka vıtse-mınıstri Qaıyrhan Tutqyshbaev atap ótkendeı, bastapqyda salyqtyq manevrdi Eýrazııalyq ekonomıkalyq odaqtyń munaı jáne munaı ónimderiniń ortaq naryǵyn iske qosýmen úndestirý kózdelgen bolatyn. Reforma renta salyǵyn, paıdaly qazbalardy óndirýge salynatyn salyqty jáne eksporttyq kedendik bajdy qamtıtyn qoldanystaǵy salyq júktemesin shoǵyrlandyrýdy kózdeıdi. Bul rette eksportqa jetkizý kezinde munaı úshin Saýda mınıstrliginiń buıryǵymen bekitilgen eksporttyq kedendik baj joıylǵan joq. Bul is júzinde EKB qosarlanǵan eseptelýine ákep soǵýy múmkin.
Memlekettik kirister komıtetiniń ókili Salyq kodeksinde kózdelgen mólsherlemeler renta salyǵy men eksporttyq kedendik bajdyń kúshin joıýdy eskere otyryp qalyptastyrylǵanyn túsindirdi. Sondyqtan ádisnamada EKB qosarlanǵan esepteý kózdelmegen. Tıisti norma EAEO munaı jáne munaı ónimderiniń ortaq naryǵyn iske qosýmen bir mezgilde qoldanylýy tıis. Ony qalyptastyrý merzimderiniń aýysýyna baılanysty Salyq kodeksiniń erejelerin ortaq naryqty iske qosýdyń jańa merzimderimen sınhrondaý qajet.
Osyǵan deıin ımporttalatyn dáriler qaı kezde QQS-dan bosatylatynyn jazǵanbyz.
