Dári-dármek satyp alý kezinde memleketke 3,7 mlrd teńge zalal keltirilgen — QMA
ASTANA. KAZINFORM — Qarjylyq monıtorıng agenttigi dárilik preparattardy satyp alý kezinde múliktik zalal keltirý faktisi boıynsha tergep-tekserýdi aıaqtady.
«Interfarmservıs» JShS Qazaqstan aýmaǵynda Dıýshenn bulshyqet dıstrofııasyn emdeýge arnalǵan dárilik zattardyń dıstrıbıýtory jáne jalǵyz jetkizýshisi bola otyryp, bes jyl boıy olardy elimizdiń medıtsınalyq uıymdaryna jetkizip kelgen. Atalǵan preparattar boıynsha óndirýshi shekti satý baǵalaryn belgilegen.
Alaıda kompanııa basshylyǵy zańsyz paıda tabý maqsatynda jetkizý tizbegine Birikken Arab Ámirlikterinde tirkelgen ózderine baǵynysty kompanııany qosyp, sol arqyly jalǵan mámileler júrgizgen. Osy shema arqyly preparattardyń satý baǵasy jasandy túrde ósirilip, olardyń naqty ózindik quny jasyrylyp, zańsyz paıda alynǵan.
Saldarynan memleketke 3,7 mlrd teńge kóleminde zalal keltirildi. Alynǵan tabysqa salyq tóleýden jaltarý maqsatynda seriktestik basshylyǵy túrli jeke kásipkerlermen jalǵan mámileler jasap, jalǵan shot-faktýralar rásimdeý arqyly qarajatty shyǵarý shemasyn uıymdastyrǵan. Sonyń saldarynan 4 mlrd teńgeden astam qarajat qolma-qol aqshaǵa aınaldyrylǵan.
— Kompanııa 637 mln teńgeden astam salyq tóleýden jaltarǵan. Zańsyz baıý nátıjesinde kásipkerler 32 páter, 11 avtokólik jáne 8 turǵyn úı satyp alǵan. Atalǵan múlikke tárkileý maqsatynda tyıym salyndy. Eki kúdiktige qatysty úıqamaq túrindegi bultartpaý sharasy, úshinshi tulǵaǵa qatysty kepil túrindegi bultartpaý sharasy qoldanyldy. Qazir taraptar qylmystyq is materıaldarymen tanysýdy bastady, — delingen habarlamada.
Osyǵan deıin DSM Qazaqstanda dárilik zattardyń baǵasy jedel ósip jatyr, jekelegen dári ataýlary boıynsha baǵa 52%-dan 66%-ǵa deıin kóterildi degen aqparatty joqqa shyǵardy.
