Dári-dármek máselesi: Úkimet mınıstrlik pen SQ-Farmatsııaǵa birqatar tapsyrma júktedi
ASTANA. KAZINFORM — Búgin Úkimet otyrysynda Premer-mınıstr Oljas Bektenov dári-dármek máselesáne qatysty jaýapty mınıstrlikke birqatar tapsyrma berdi.
— Densaýlyq saqtaý mınıstrligi «SQ-Farmatsııa» kompanııasymen birlesip, osy jyldyń jeltoqsan aıynda medıtsınalyq buıymdardy satyp alýdyń jańa modelin iske qosýdy qamtamasyz etsin. Ónimderdiń biryńǵaı bazasyn qalyptastyrý, tehnıkalyq erekshelikterdi birizdendirý, referenttik baǵa belgileý tetigin engizý jáne otandyq óndirýshilerdiń qatysý aıasyn keńeıtý sharalaryn qabyldaý kerek. Dárilik zattar men medıtsınalyq buıymdardy satyp alý boıynsha barlyq rásimdi osy jyldyń sońyna deıin jedel júrgizý qajet. Qańtar aıynda aýrýhanalarda, emhanalar men dárihanalarda barlyq qajetti zat bolýǵa tıis. Ómirlik mańyzy bar dárilik zattardy erekshe baqylaýda ustańyzdar, — dedi Oljas Bektenov.
Sonymen qatar ol Densaýlyq saqtaý mınıstrligi emdelýshilerge berilgenge deıin dárilik zattardyń qozǵalysyna tolyq tsıfrlyq monıtorıng júrgizýdi qamtamasyz etýi tıis ekenin aıtty. Shekti baǵalardyń saqtalýyna baqylaýdy kúsheıtip, qarjy jymqyrý áreketterine qatań tosqaýyl qoıý qajet. Aqysyz berýge arnalǵan dárilerdi zańsyz satýdyń aldyn alý úshin olardy tańbalaý tetigin paıdalaný kerek.
— Densaýlyq saqtaý mınıstrligi óńir ákimdikterimen jáne «Qazaqtelekom» kompanııasymen birlesip, osy jyldyń sońyna deıin dárilik zattardy saqtaý kezindegi «sýyq tizbek» monıtorıng júıesin iske qosýdy qamtamasyz etsin. Qoımalardy, medıtsınalyq uıymdar men tońazytqyshtary bar kólik quraldaryn biryńǵaı tsıfrlyq júıege qosýdy qarastyrý qajet. Budan bólek, Densaýlyq saqtaý mınıstrligi kelisimderde belgilengen merzimderge sáıkes ınvestorlardyń mindettemeleriniń oryndalýyna, onyń ishinde ınvestıtsııalar salý, óndiristik qýattardy iske qosý jáne medıtsınalyq buıymdar men dárilik zattardy shyǵarý barysyna turaqty monıtorıng júrgizsin. Óńir ákimderi Densaýlyq saqtaý mınıstrligimen birge árbir osyndaı jobaǵa qoldaý kórsetip, jer jáne ınfraqurylym máselelerin ýaqtyly sheshýdi, sondaı-aq jumys kesteleriniń saqtalýyn baqylaýdy qamtamasyz etsin. Óńir ákimdikteri dárilik zattar men medıtsınalyq buıymdardy saqtaý jáne taratý úshin biryńǵaı dıstrıbıýtordyń qoımalaryn salý jobalaryn jandandyrýǵa qoldaý kórsetsin, — dedi Úkimet basshysy.
Munymen qosa O. Bektenov bıýdjet shyǵyndaryn azaıtý jáne Densaýlyq saqtaý mınıstrligi bekitken tizimge sáıkes óńirlerde dárilik zattar men medıtsınalyq buıymdardy satyp alý kezinde ashyqtyqty arttyrý maqsatynda ákimdikterge olardyń tek «SQ-Farmatsııa» biryńǵaı dıstrıbıýtorynan satyp alyýyn qamtamasyz etýin tapsyrdy.
— Jalpy, barlyq memlekettik organ otandyq farmatsevtıka ónerkásibin damytýǵa belsendi túrde qoldaý kórsetýge tıis, — dedi ol
Buǵan deıin habarlanǵandaı, Premer-mınıstr halyqty tegin dárimen qamtamasyz etý júıesine qatysty tapsyrma berdi.
