Dári-dármek baǵasynyń kúrt óskeni ras pa — DSM túsinikteme berdi
ASTANA. KAZINFORM — Keıbir buqaralyq aqparat quraldarynda Qazaqstanda dárilik zattardyń baǵasy jedel ósip jatyr, jekelegen dári ataýlary boıynsha baǵa 52%-dan 66%-ǵa deıin kóterildi degen aqparat shyndyqqa janaspaıdy, dep habarlaıdy DSM baspasóz qyzmeti.
Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti patsıentterdiń qarjylyq júktemesin azaıtý jáne negizsiz ústeme baǵalardy boldyrmaý maqsatynda dárilik zattarǵa shekti baǵalardy qalyptastyrý tetigin engizdi.
Qazir bólshek saýda jelisinde satylatyn 4994 saýda ataýyna shekti baǵalar belgilengen. Bul tizbege júrek-qan tamyrlary júıesi, tynys alý aǵzalary, ınfektsııalyq aýrýlardy jáne basqa da keń taralǵan aýrýlardy emdeýde qoldanylatyn preparattar engizilgen. Bul rette farmatsevtıkalyq qyzmet sýbektileri dárilik zattardy belgilengen shekti baǵadan asyrmaı satýǵa mindetti.
— Eldiń 20 óńirinde júrgizilgen monıtorıngtiń nátıjesi boıynsha, 2026 jylǵy naýryzda 2025 jylǵy maýsymmen salystyrǵanda 631 ataý boıynsha baǵa orta eseppen 24,6%-ǵa tómendegeni tirkeldi. Retteletin segmentte dárilik zattardyń 50%-dan astamy turaqty deńgeıin saqtap otyr, al preparattardyń 25%-ynda baǵa tómendegenin atap ótken jón, — delingen habarlamada.
Sonymen qatar, 1707 retseptisiz beriletin preparat memlekettik retteýge jatpaıdy jáne naryq qaǵıdattary boıynsha satylady. Olardyń ishinde 2025 jylmen salystyrǵanda baǵasy 5%-dan 15%-ǵa deıin azdap ósken dáriler bar, al keıbir pozıtsııalar boıynsha 11%-ǵa deıin tómendeý baıqalady.
— Mysaly, 2025 jyly 20 tabletkadan turatyn paratsetamoldyń baǵasy 200 teńge bolsa, 2026 jyly tańbalaý aqparattyq júıesiniń derekteri boıynsha 188 teńgeni qurap, 6%-ǵa tómendegen. Belsendirilgen kómir 2025 jyly bólshek saýdada 130 teńgeden satylsa, 2026 jyly 144 teńgege deıin ósip, 9%-ǵa qymbattaǵan. Sonymen qatar, keıbir BAQ habarlaǵandaı, jekelegen preparattar boıynsha baǵanyń 52%-dan 66%-ǵa deıin ósýi týraly aqparat jalǵan, — delingen habarlamada.
Budan bólek, tirkelgen dárilik zattardyń 3000-nan astamy (44%) TMKKK jáne MÁMS sheńberinde QQS-tan bosatylǵan, onyń ishinde áleýmettik máni bar aýrýlardy emdeýge arnalǵan 1200 dári bólshek saýdada da QQS-tan bosatylǵan.
Osyǵan deıin Premer-mınıstr Oljas Bektenovtiń Memleket basshysynyń otandyq farmatsevtıkalyq ónerkásipti damytý jónindegi tapsyrmalaryn júzege asyrý sheńberinde Otandyq kásipkerler ótkizgen keńeske qatysty.
