Dári baǵasyn túsirgen tórt tásil: Qazaqstan qansha aqsha únemdedi
ASTANA. KAZINFORM — Qazaqstanda dárilik zattar men medıtsınalyq buıymdardy óndirýshilerden tikeleı satyp alý kólemi artyp keledi. Bul satyp alý rásimderiniń tıimdiligin arttyryp, memlekettik qarajatty únemdeýge múmkindik berip otyr.
Densaýlyq saqtaý mınıstrliginiń baspasóz qyzmetiniń málimetinshe, 2026 jylǵy satyp alý naýqanynyń qorytyndysy boıynsha jalpy ekonomıkalyq tıimdilik 70 mlrd teńgeni qurady. Onyń shamamen 25 mlrd teńgesi otandyq jáne sheteldik óndirýshilermen tikeleı kelisimsharttar kólemin ulǵaıtý esebinen únemdeldi.
Sońǵy úsh jylda óndirýshilerden tikeleı satyp alý kólemi 187%-ǵa ósken. Bul rette deldal býyndardy qysqartý, farmatsevtıkalyq kompanııalarmen kelissózder júrgizý, halyqaralyq satyp alýlar men básekelestik rásimder dári-dármekti tıimdi baǵamen satyp alýǵa múmkindik berip otyr.
Sonymen qatar Qazaqstanda dárilik zattardyń baǵasyn qalyptastyrý júıesi jetildirilip jatyr. Óndirýshi baǵasyn tirkeýdiń biryńǵaı tásili, halyqaralyq referenttik baǵa belgileý jáne negizsiz ústeme baǵalardy shekteýge baǵyttalǵan basqa da tetikter engizilgen.
Jańa tásilderdiń nátıjesinde bıyl birqatar dárilik preparattardyń baǵasy birneshe esege tómendedi. Baǵa belgileýdiń jańa tetikteri arqyly shamamen 36,2 mlrd teńge únemdeldi.
Óndirýshilerden tikeleı satyp alý
2025 jyldan bastap dári-dármekke baǵa usynystaryn tikeleı zaýyt-óndirýshilerden suratý tetigi engizildi. Bul 400-den astam ataýdaǵy dárilik zatty óndirýshilerden tikeleı satyp alýǵa múmkindik berdi.
Kelissózder nátıjesinde otandyq óndiristiń 66 ataýdaǵy dárilik zattary boıynsha 10 mlrd teńgeden astam qarajat únemdeldi.
Halyqaralyq satyp alýlar
Dári-dármek satyp alýda BUU júıesindegi halyqaralyq uıymdardyń múmkindikteri de paıdalanylyp keledi. Atap aıtqanda, preparattar BUUDB, ıÝNISEF jáne STOP TB arqyly satyp alynady.
Osy tetikti keńeıtý nátıjesinde shamamen 17 mlrd teńge únemdeldi. Halyqaralyq satyp alýlar iri kólemde tapsyrys berip, halyqaralyq jetkizýshilermen tikeleı jumys isteý arqyly tıimdi baǵaǵa qol jetkizýge múmkindik beredi.
Bul tásil qymbat dárilik preparattardy satyp alý kezinde de qoldanylady.
Aýktsıondar arqyly taǵy 15 mlrd teńge únemdeldi
Qarajatty únemdeýdiń taǵy bir joly — aýktsıondyq rásimder. Munda áleýetti ónim berýshiler baǵa boıynsha ózara básekelesedi.
Aýktsıondardyń qorytyndysy boıynsha 15 mlrd teńgeden astam qarajat únemdeldi.
Osylaısha, dári-dármek satyp alý qunyn tómendetý birneshe baǵyt boıynsha júzege asyrylyp otyr. Olar — óndirýshilermen tikeleı kelisimshart jasaý, baǵany tómendetý jónindegi kelissózder, halyqaralyq satyp alýlar jáne básekelestik rásimder.
Mamandardyń túsindirýinshe, memlekettik satyp alýdaǵy únem dárilik zattardyń kólemin qysqartýdy bildirmeıdi. Kerisinshe, únemdelgen qarajat dári-dármektiń qosymsha kólemin satyp alýǵa jáne patsıentterdi emdeý múmkindikterin keńeıtýge baǵyttalady.
Máselen, 2025 jylǵy satyp alý naýqanynyń qorytyndysy boıynsha únemdelgen 70,5 mlrd teńge qosymsha dárilik qamtamasyz etýge jumsaldy. Onyń ishinde onkologııalyq, júrek-qan tamyrlary jáne aýtoımmýndyq aýrýlardy emdeýge arnalǵan jeti ınnovatsııalyq preparat tegin beriletin dárilik zattar tizimine engizildi.
Buǵan deıin onkologııada dári-dármek qaýipsizdigin arttyratyn jańa júıe engizilgenin jazǵanbyz.
