Dańqty surmergen Ybyraıym Súleımenovke «Halyq qaharmany» ataǵy berilse deımiz - senator
NUR-SULTAN. QazAqparat - ІІ Dúnıejúzilik soǵys kezinde qaısarlyǵymen tanylyp, 289 nemisti jer jastandyrǵan, ózi de sol keskilesken urysta qaza tapqan dańqty surmergen Ybyraıym Súleımenovke «Halyq qaharmany» ataǵy berilse eken. Mundaı usynysty senator Muhtar Qul-Muhammed kóterip otyr, dep habarlaıdy QazAqparat tilshisi.
Jaqynda «Egemen Qazaqstan» gazetine kórnekti memleket qaıratkeri, Senattyń halyqaralyq qatynastar, qorǵanys jáne qaýipsizdik komıtetiniń tóraǵasy, alashshyl azamat Muhtar Qul-Muhammedtiń «Óshpes erlik» atty maqalasy jaryq kórdi.
Maqalanyń oryssha nusqasy «Kazahstanskaıa pravda» gazetinde de jarııalandy. Osy eńbekte ІІ Dúnıejúzilik soǵys kezinde qaısarlyǵymen tanylyp, 289 nemisti jer jastandyrǵan, ózi de sol keskilesken urysta qaza tapqan dańqty surmergen Ybyraıym Súleımenovtiń erligi baıandalady.
Ybyraıym Súleımenov - qazirgi Jambyl oblysynyń týmasy. Maqalada aıtylǵandaı, ol 1941 jyly áskerge shaqyrylyp, Almatydaǵy 100-atqyshtar brıgadasyna kelip qosylady.
Al 1942 jyldyń tamyzynda Máskeý áskerı okrýginiń qaramaǵyna kelip, osy jyldyń qazan aıynda Kalının maıdanynyń quramynda soǵysqa aralasady.
Quralaıdy kózge atqan mergen atamyz ІІ Jahan soǵysy tarıhyndaǵy úsh úlken áskerı operatsııaǵa – «Mars» dep atalatyn Rjev, Sychevka baǵytyndaǵy shabýylǵa, Velıkıe Lýkı qalasyn azat etý joryǵyna jáne Nevel qalasyn jaýdan bosatýǵa arnalǵan shaıqastarǵa qatysypty.
Osynyń bárinde ǵajaıyp mergendigimen kózge túsip, úsh ret qatarynan áskerı marapatqa usynylady.
Onyń erligin Uly Otan soǵysynyń dańqty qolbasshylary – Keńes Odaǵynyń Batyry, armııa generaly K.Galıtskıı, general-leıtenant F.Lısıtsyn, general-maıor F.Zýev jáne general-maıor A.Lıtvınov moıyndady.
Moıyndap qana qoıǵan joq, mergendi qatarynan birneshe ret mártebeli marapattarǵa usynyp, soǵys aıaqtalǵannan keıin jarııalaǵan áskerı memýarlarynda onyń erligin zor rızashylyqpen tamsana jazady.
Tipti qazaq jaýyngeriniń dańqy sharyqtap, shyrqaý shyńyna jetkende – 1943 jyldyń 9 shildesinde Ybyraıym Súleımenov Keńes Odaǵynyń Batyry ataǵyna usynylady.
Bul qujatqa úsh birdeı orys generaly K.Galıtskıı, A.Lıtvınov jáne F.Zýev qol qoıǵan.
Degenmen, túrli sebeptermen Súleımenovke deńgeıi bir dárejege tómen Lenın ordeni ǵana beriledi.
Maqalada osyndaı derekterdiń bári Reseı Federatsııasy Qorǵanys mınıstrliginiń ortalyq áskerı muraǵatynda saqtalyp turǵan naqty málimettermen dáleldi túrde keltirilgen. Qujattardyń sýretteri de qosa berilgen.
Sondaı-aq, osy maqalada kezinde Altyn Juldyz buıyrmaǵan Ybyraıym Súleımenovke táýelsiz Qazaq eliniń «Halyq qaharmany» ataǵyn berý týraly másele kóterilgen.
«Shyn máninde, bul - ábden qoldaýǵa turarlyq bastama. Osy bastama nazardan tys qalmaı, tıisti sheshimder qabyldansa eken degen tilegimiz bar» deıdi senator.
