Dańqqa aparar jol: Paralımpıada–2026 oıyndarynyń qazaqstandyq alǵashqy júldegeri nesimen tanymal
ASTANA. KAZINFORM — 28 jastaǵy Erbol Hamıtov Mılan men Kortına-d’Ampetstsoda ótip jatqan 2026 jylǵy qysqy Paralımpıada oıyndarynda Qazaqstan qorjynyna alǵashqy medaldi saldy. Bul marapatqa jetý úshin sportshy qıyn da kúrdeli joldan ótti.
Búginde basqa bir shynaıylyqta ol álemniń eń bedeldi jekpe-jek uıymy — Ultimate Fighting Championship týrnırinde jeńil salmaqtaǵy chempıondyq beldik úshin Alexander Volkanovskimen kezdesýi de múmkin edi. Mundaı stsenarıı shyndyqqa aınalýy yqtımal bolatyn. Alaıda Erbol Hamıtovtyń ómirinde 2017 jyly bolǵan oqıǵa bárin ózgertti.
Ol kezde Erbol grepplıng pen djıý-djıtsýmen belsendi aınalysyp, bolashaǵynan zor úmit kúttirgen sportshylardyń biri edi. Aldaǵy ýaqytta iri jarystarǵa qatysyp, tipti UFC-de óner kórsetýdi armandady. Biraq bir qaıǵyly oqıǵa onyń taǵdyryn kúrt ózgertti. Túngi klýbta kúzetshi bolyp jumys istep júrgende, ol atys bolǵan jerde qalyp qoıady. Tizesine tıgen oq saldarynan bir aıaǵynan aıyryldy. Degenmen bul jaǵdaı onyń sporttaǵy úlken jetistikke jetý týraly armanyn óshire almady.
Ol súıikti jekpe-jek sportynan qol úzbeı, jattyǵýyn jalǵastyrdy. 2019 jyly grepplıngten Azııa birinshiliginde (AIGA, Adult sanaty) kúmis júlde ıelenip, sondaı-aq UWW uıymynyń NoGi-Intermediated sanatynda Azııa chempıony atandy. Alaıda Paralımpıada oıyndarynyń baǵdarlamasynda onyń sanatyna sáıkes keletin jekpe-jek túrleri joq edi (tek kórý qabileti nashar sportshylarǵa arnalǵan dzıýdo bar). Sondyqtan Erbol ózin Paralımpıadanyń qysqy sport túrlerinde synap kórýge bel býdy.
Osylaısha ol týǵan qalasy Petropavlda múmkindigi shekteýli jandarǵa arnalǵan sport sektsııasyna jazylyp, shańǵy sportymen aınalysa bastady.
2022 jyly Qysqy Paralımpıada oıyndarynda (LW12 klasy, otyryp jarysady) Erbol Hamıtov alǵash ret baq synap, besinshi jáne jetinshi oryndardy ıelendi. Sol kezde elge oralǵan soń bergen suhbatynda bul nátıje onyń múmkindiginiń shegi emes ekenin aıtyp, aldaǵy ýaqytta álemdik tuǵyrlardyń bıiginen kórinetinine ýáde bergen edi.
Kóp uzamaı bul sózin is júzinde dáleldedi. 2023 jyly Paralımpıadalyq shańǵy jarysynan álem chempıony atansa, 2025 jyly parabıatlonnan álem chempıony ári Álem kýbogynyń jalpy esebinde jeńimpaz boldy. Mundaı jetistikter Qazaqstannyń kóptegen býyn olımpıadashylary úshin arman bolyp kelgen. Al Erbol Hamıtov bul ataqtardy paralımpıadalyq sportta elge ákeldi, mundaǵy báseke deńgeıi de kem emes.
2026 jylǵa qaraı onyń marapattar kollektsııasynda bir ǵana júlde jetispeıtin — Paralımpıada medali. Sondyqtan 2026 Winter Paralympics oıyndaryna ol naqty bir maqsatpen keldi.
Alǵashqy eki jarys kúninde Erbol bıatlonnan eki básekege qatysty. Ol segizinshi jáne altynshy oryndardy ıelendi. Nátıje budan da joǵary bolýy múmkin edi, alaıda nysana kózdeýdegi qatelikter kedergi boldy. Sportshy da, jankúıerler de medaldi shańǵy jarysynan alýǵa múmkindik bar ekenin sezdi.
10 naýryz Erbol Hamıtov úshin taǵdyrly kúnge aınaldy. Italııadaǵy Tezero trassasynda ol barlyq kúshin jınap, júlde úshin kúresýge tıis edi. Іrikteý kezeńinde altynshy nátıje kórsetip, jartylaı fınalǵa senimdi ótti. Al jartylaı fınalda qarsylastarynan aıqyn basym túsip, fınalǵa joldama aldy.
Fınalda onyń basty qarsylastarynyń biri qytaılyq Liu Zixu boldy. Saıystyń sońynda dál osy sportshy jeńiske jetti. Qarsylastar Hamıtovtyń qarqynyn bilip, oǵan jyldamdyq jınaýǵa múmkindik bermeýge tyrysty. Biraq tájirıbeli qazaqstandyq durys taktıka tańdap, márege jaqyndaǵanda sprıntte sheshýshi serpilis jasap, kópten kútken Paralımpıada medalin jeńip aldy. Ázirge qola júlde, biraq bul — sońǵy nátıje emes.
Erbol Hamıtov óz úlgisi arqyly adam qandaı qıyndyqqa tap bolsa da, maqsatyna tabandylyqpen umtylsa, bári múmkin ekenin taǵy bir dáleldedi. Buǵan deıin bergen suhbattarynyń birinde ol qazaqstandyq sportshylardyń rýhy myqty ekenin jáne olar kez kelgen ataqty qarsylaspen teń dárejede básekelese alatynyn aıtqan edi. Búginde sol sózdiń dáleli — ózi. Qazir Erbol Hamıtov — tıtýldy sportshy ári el maqtanyshy.
2026 jylǵy qysqy Paralımpıada oıyndary áli jalǵasyp jatyr. Qazaqstan quramasy júldeler úshin kúresin jalǵastyryp jatyr.
Aıta keteıik, Erbol Hamıtov qysqy Paralımpıada oıyndarynyń qola júldesin ıelendi.
Osylaısha Qazaqstan quramasy qysqy Paralımpıadada 22-orynǵa taban tiredi.
