Danııar jarysqa psıhologııalyq turǵydan daıyn bolmady – Ulttyq quramanyń bas bapkeri
PARIJ. KAZINFORM – Parıjde ótip jatqan Olımpıada oıyndaryna dzıýdodan ulttyq quramany bastap kelgen bas bapker Nurbol Súleımenov shákirtteriniń jetistigi men kemshin tustary týraly aıtyp berdi.
- Búgin Danııar Shamshaev qarsylasynan utylyp qaldy. Oǵan ne sebep boldy?
- Danııar Shamshaev jarysqa psıhologııalyq turǵydan daıyn bolmady. Bul jaı jarys emes, Olımpıada oıyndary. Sondyqtan ár sportshy fızıkalyq turǵydan da, psıhologııalyq turǵydan da daıyn bolý kerek.
- Sizdermen birge jumys isteıtin psıhologtar bar shyǵar?
- Bar, biraq bizben birge únemi erip júre almaıdy. Keıde onlaıyn jumys isteıdi. Ózimizdiń bazada bolady.
- Aldaǵy jarysqa shyǵatyn balýandarymyzdyń áleýeti qalaı? Taǵy kimderden úmit kútemiz?
- Bul Azııa emes, álem chempıonaty emes, grandslam emes, Olımpıada degen erekshe jarys qoı. Sondyqtan sportshylarymyz eń bastysy psıhologııalyq jaǵynan myqty bolý kerek dep oılaımyn. Sportshylarymyzdyń barlyǵy Olımpıadaǵa tyńǵylyqty daıyndaldy. Kimniń baǵy janatynyn aldaǵy ýaqyt kórsetedi.
- Dzıýdo quramasynan eń birinshi bolyp Eldos altyn júlde syılady. Bul basqa quramadaǵy jigitterge qanshalyq serpin berip jatyr?
- Eldostiń altyny ózge sportshylarǵa óte úlken kúsh berdi dep aıtýǵa bolady. Eldostiń altynyn qoldaryna alyp, moıyndaryna taǵyp, bári de múmkin ekenin sezindi. Keshe Ǵusyman Qyrǵyzbaevqa Eldos qandaı úlken qoldaý kórsetti. Ony ózderińiz de kórdińizder. Mine, jigit degen Eldostaı bolý kerek. Onyń ústine Eldos pen Ǵusyman uzaq ýaqyt birge kele jatyr. Olar óte jaqsy dos.
- Ǵusyman Qyrǵyzbaevtiń fınalǵa deıin jetýine múmkindigi boldy ma?
- Árıne, boldy. Sál sáttilik jetpeı qaldy oǵan. Ol bala osyǵan deıingi qurlyqtyq dodalardyń ózinde 4-5-oryndarda júrgen edi ǵoı. Mine, Olımpıadada baǵy jandy. Eń bastysy elge júldemen bara jatyr.
- Sportshylarymyz elge qashan oralady?
- Bizde 3 tamyzda komandalyq jarys bolady. Sol jarysqa qatysamyz. Alla qalasa ertesi jolǵa shyǵyp, 5 tamyz kúni tańda Almaty áýejaıyna qonamyz. Oǵan deıin Eldos ta, Ǵusyman da osynda bolady. Komandamen birge qaıtamyz.
- Áńgimeńizge raqmet!
