Danııar Qaısanov erkin kúresten ulttyq quramanyń aldaǵy josparyn jarııalady

ASTANA. KAZINFORM — Erkin kúresten Qazaqstan ulttyq quramasy bas bapkeri Danııar Qaısanov aldaǵy jospary jóninde aıtyp berdi.

Bul jóninde Qazaqstan kúres federatsııasynyń áleýmettik jelidegi paraqshasynda jarııalandy.

2019 jylǵy álem chempıonatynyń qola júldegeri Danııar Qaısanov jaqynda erkin kúresten Qazaqstan quramasynyń bas bapkeri bolyp taǵaıyndalǵan edi.

Danııar Qaısanov 2017 jyldan beri Qazaqstan ulttyq quramasynyń sapynda óner kórsetti. 2019 jyly ol álem birinshiliginde úshinshi oryndy ıelendi.

2020 jylǵy Tokıo (Japonııa) Olımpıadasynda Qaısanov júldege bir qadam jetpeı, qola medal úshin ótken beldesýde jeńilip qaldy. Sondaı-aq onyń enshisinde Azııa chempıonatynyń eki altyn medali bar.

— Bul — bizdiń alǵashqy oqý-jattyǵý jıynymyz. Daıyndyq Almaty qalasynda ótip jatyr. Ázirlik barysy kóńilden shyǵyp jatyr deýge bolady. Balýandar da óziniń babyn keltirýge kóńil bóldi. Ulttyq qurama kóshbasshylary da keldi. Jospar boıynsha alǵashqy jarysymyz — Albanııada ótetin Muhamet Malo reıtıngilik týrnıri. Sondaı-aq Belarýs astanasy Mınsk qalasynda Medvedev týrnıri bolady. Qurama músheleri osy eki týrnırde baq synaıdy. Bul jarystar Azııa chempıonatyna daıyndyqtyń bastaýy ispettes. Sol arqyly balýandardyń qandaı kúıde ekenin baǵamdaımyz. Nátıjesinde olardyń tájirıbesin arttyrý, sheberligin jetildirýge mán beremiz. Qatelikter boıynsha saraptama jasaımyz, — dedi Danııar Qaısanov.

Tájirıbeli maman jaqynda jasaqtalǵan Qazaqstan erkin kúres quramasynyń bapkerlik quramy jóninde oıyn bildirdi. Federatsııa sheshimimen aǵa jattyqtyrýshy qyzmetine Aslan Baıgýlov taǵaıyndalsa, endi Nurlan Bekjanov, Jiger Zákirov, Kamal Gadjımagomedov jattyqtyrýshy qyzmetin atqaratyn boldy.

— Bapkerlikke qyzmetke kelgeli úlken jaýapkershilikti sezinemin. Buryn balýan retinde óz nátıjeme jaýap beretin edim. Endi ulttyq qurama jaýapkershiligi maǵan júktelgen. Qazir sol baǵytta jumys jasaımyz. Bapkerlik quramǵa bilikti mamandar jınaqtalǵan. Atap aıtsaq, Aslan Baıgýlovtyń on bes jyldan astam tájirıbesi bar. Oǵan qosa 2016 jyly álem jáne Azııa chempıonatynda kúmis júldeger atanǵan Nurlan Bekjanov, sol jylǵy Azııa chempıonatynyń kúmis júldegeri Jiger Zákirov, Nurqoja Qaıpanov syndy álem chempıonyn daıyndap shyǵarǵan Kamal Gadjımagomedov syndy bilikti mamandar ulttyq quramanyń aldaǵy ýaqytta nátıjesin jaqsartýǵa kúsh salady. Balýandarǵa ol kisilerden úırenetin nárse az emes, — dep tolyqtyrdy sózin D.Qaısanov.

Budan buryn erkin kúresten Qazaqstan 20 jasqa deıingi jastar quramasynyń aǵa bapkeri qyzmetine Dáýlet Nııazbekov taǵaıyndalǵany belgili boldy.