Danııar Eleýsinovke qatysty jol apaty tekserilip jatyr
ASTANA. KAZINFORM — Astanada eki jol-kólik oqıǵasy bolyp, saldarynan birneshe avtokólikke zaqym keldi. Bul týraly Astana polıtsııa departamenti habarlady.
Aldyn ala málimet boıynsha, Toyota Land Cruiser avtokóliginiń júrgizýshisi birneshe kólikpen soqtyǵysyp, oqıǵa ornynan ketip qalǵan. Áleýmetik jelide taraǵan habarǵa sensek, kóliktiń tizgininde Olımpıada chempıony Danııar Eleýsinov bolǵan.
Jedel-izdestirý is-sharalarynyń nátıjesinde polıtsııa qyzmetkerleri atalǵan avtokólikti anyqtap, Dostyq kóshesinde toqtatty.
Polıtsııanyń málimetinshe, kólik tizgininde alkogoldik masańdyq belgileri bar 35 jastaǵy er adam bolǵan.
Jol-kólik oqıǵalary saldarynan zardap shekkender joq.
Atalǵan fakti boıynsha tekserý júrgizilip jatyr. Onyń qorytyndysy boıynsha júrgizýshiniń áreketine quqyqtyq baǵa berilip, Qazaqstan Respýblıkasynyń zańnamasyna sáıkes tıisti sharalar qabyldanady.
Polıtsııa departamenti «Zań men tártip» qaǵıdatynyń ózgermeıtinin eske saldy.
— Jaýapkershilik adamnyń tanymaldyǵyna, kásibine, laýazymyna nemese sińirgen eńbegine baılanysty emes. Zańdy buzyp, jaýapkershilikten jaltarýǵa áreket jasaǵan árbir adam zańda belgilengen tártippen jaýaptylyqqa tartylady, — delingen habarlamada.
Aıta keteıik, buǵan deıin Kókshetaýda belgili qazaqstandyq boksshy Temirtas Júsipov áıeline dene jaraqatyn saldy degen kúdikke ilingen bolatyn.
