Danııar Eleýsinov sharshy alańǵa qaıta oralady
ASTANA. KAZINFORM – All Stars Boxing kompanııasynyń baspasóz qyzmeti tanymal qazaqstandyq boksshy Danııar Eleýsinovtiń kezekti jekpe-jegin jarııalady. Bul týraly Sports.kz saıty málimdedi.
– Qazaqstandyq boksshy, Qazaqstan Respýblıkasynyń eńbek sińirgen sport sheberi, Azııa oıyndarynyń eki dúrkin chempıony jáne Olımpıada chempıony Danııar Eleýsinov All Stars Boxing keshiniń basty jekpe-jeginde qolǵap túıistiredi, - dep habarlady kompanııadan.
Týrnır 28 qyrkúıekte Almatydaǵy «Almaty Arenada» ótedi.
Eske sala keteıik, Eleýsinov kásipqoı rıngtegi sońǵy jekpe-jegin 2021 jyldyń jeltoqsan aıynda Astanada argentınalyq Hýan Ernan Lealǵa qarsy ótkizip, tóreshiler biraýyzdan Danııarǵa basymdyq berip, IBO tujyrymy boıynsha jartylaı orta salmaqtaǵy tıtýldy jeńip alǵan bolatyn.
