Danııar Eleýsinov pen medıa-boksshy rıngke shyǵa ma - federatsııa pikiri

ASTANA. KAZINFORM – Qazaqstan kásipqoı boks federatsııasynyń prezıdenti Rahymjan Erdenbekov akter Erkebulan Toqtar men qazaqstandyq boksshy, Olımpıada chempıony Danııar Eleýsinov arasyndaǵy yqtımal jekpe-jekke qatysty pikirin aıtty.

Áleýmettik jelilerde Erkebulan Toqtar men Danııar Eleýsinov arasyndaǵy bolýy múmkin aıqas taqyryby keńinen talqylanyp jatyr. Bul jekpe-jek týraly máseleni sońǵy ýaqytta Danııar Eleýsinovtiń ózi jıi kóterip júr.

Rahymjan Erdenbekov bul jaǵdaıda sporttyq básekeden góri kommertsııalyq múdde basym bolýy múmkin ekenin atap ótti. Onyń sózinshe, mundaı kezdesýlerde eki túrli uǵymdy ajyratyp alý qajet.

«Birinshisi – sporttyq múdde. Ekinshisi – kommertsııalyq múdde. Meniń oıymsha, bul jaǵdaıda eki tarapta da kommertsııalyq qyzyǵýshylyq basym. Sebebi boks sheberligi jaǵynan Danııar Eleýsinov Erkebulan Toqtardan áldeqaıda joǵary. Eger jekpe-jek taza bokstyń erejesimen ótse, jeńis Eleýsinovke tıesili bolady. Men Toqtardyń jekpe-jekterin kórdim. Onyń deńgeıi ázirge Eleýsinovke sáıkes kelmeıdi», – dedi QKBF prezıdenti.

Federatsııa basshysy kásipqoı boksshylardyń bokspen kásibı aınalyspaıtyn adamdarmen jekpe-jekke shyǵýyn qoldamaıtynyn jetkizdi. Onyń pikirinshe, mundaı kezdesýler sporttyń mánin tómendetýi múmkin.

Sondaı-aq Rahymjan Erdenbekov medıa-boksshylar men kásipqoı boksshylardy bólek lıgalarǵa bólý qajet ekenin aıtty. Bul eki baǵyttyń erejesi men maqsaty ártúrli bolýy tıis.

Al Danııar Eleýsinovtiń kásipqoı rıngtegi iri jekpe-jekterine kelsek, QKBF prezıdenti bul másele federatsııaǵa emes, sportshynyń promoýterlerine baılanysty ekenin málimdedi.

Aıta keteıik, jazda Danııar Eleýsinovtiń jańa boks promoýshenimen kelisimshart jasaǵany habarlandy.