Danııar Eleýsinov 20 táýlikke qamalyp, 7 jyl kólik júrgizý quqyǵynan aıyryldy
ASTANA. KAZINFORM — Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda Danııar Eleýsinovke qatysty ákimshilik quqyqbuzýshylyq týraly is qaraldy.
Sotta anyqtalǵandaı, Danııar Eleýsinov alkogoldik masań kúıde avtokólikti basqaryp, Astana qalasynyń kóshelerimen avtokólikti basqaryp kele jatyp 3 jol-kólik oqıǵasyn jasaǵan.
Jol júrisi qaǵıdalarynyń talaptaryn buzý saldarynan júrgizýshi:
— jerasty avtoturaǵy qaqpasynyń tiregine soqtyǵysqan;
— basqa avtokólikpen soqtyǵysyp, ınertsııanyń áserinen taǵy bir avtokólikke soǵylǵan;
— keıinnen Kia Sportage avtokóligimen soqtyǵysyp, soqqynyń áserinen atalǵan avtokólik Toyota Hilux avtokóligine soǵylǵan.
Jol-kólik oqıǵalarynyń saldarynan kólik quraldaryna mehanıkalyq zaqym keltirilip, materıaldyq shyǵyn keltirilgen.
Quqyqbuzýshynyń kinási is materıaldarymen, onyń ishinde medıtsınalyq kýálandyrý qorytyndysymen dáleldendi. Atalǵan qorytyndyǵa sáıkes Danııar Eleýsinovte alkogoldik masańdyqtyń jeńil dárejesi anyqtalǵan. Sonymen qatar kinási ákimshilik quqyqbuzýshylyq týraly hattamalarmen, jol-kólik oqıǵalarynyń syzbalarymen, beınejazbalarmen, oqıǵaǵa qatysýshylardyń túsiniktemelerimen jáne sotta zerttelgen ózge de dáleldemelermen rastaldy.
Sot otyrysynda Eleýsinov óz kinásin tolyq moıyndady.
— Sot ÁQBtK-niń 50-babynyń 2-bóliginde kózdelgen ákimshilik qamaqty qoldanýǵa kedergi keltiretin mán-jaılardy anyqtaǵan joq. ÁQBtK-niń 608-baby 3-bóliginiń sanktsııasy balamasyz bolǵandyqtan, sot Eleýsinovke 20 táýlik merzimge ákimshilik qamaqqa alý jáne 7 jyl merzimge kólik quraldaryn basqarý quqyǵynan aıyrý túrindegi ákimshilik jaza taǵaıyndady. Qaýly zańdy kúshine engen joq, — delingen qalalyq ákimshilik quqyqbuzýshylyqtar jónindegi mamandandyrylǵan aýdanaralyq sotynyń habarlamasynda.
Buǵan deıin Danııar Eleýsinovke qatysty jol apaty tekserilip jatqanyn jazǵanbyz.
