Danııar Eleýsinovtiń júldesi úshin jarys ótti
ORAL. QazAqparat - Oraldaǵy oqýshylar jáne jastar saraıynda bokstan Olımpıada chempıony Danııar Eleýsinovtiń júldesi úshin eresekter arasynda halyqaralyq týrnır márege jetti, dep habarlaıdy QazAqparat tilshisi.
Osymen ekinshi ret uıymdastyrylyp otyrǵan jarysqa Qyrǵyzstan men Ózbekstannan, sondaı-aq Qazaqstannyń Nur-Sultan qalasynan, Aqmola, Aqtóbe, Atyraý, Batys Qazaqstan, Qyzylorda, Mańǵystaý, Túrkistan oblystarynan seksenge jýyq bylǵary qolǵap sheberi qatysty.
Tórt kúnge sozylǵan doda qorytyndysynda salmaq dárejelerine qaraı myna boksshylar chempıon atandy: Dýlat Daýtov (49 kg, Qyzylorda), Nursultan Nurıdenov (52 kg, BQO), Saǵyndyq Moldashev (56 kg, BQO), Sultan Mýsınov (60 kg, Aqmola), Rahat Seıtjan (64 kg, Aqtóbe), Saıdjamshıd Jaffarov (69 kg, Ózbekstan), Vladıslav Preobrajenskıı (75 kg, Aqmola), Erik Áljanov (81 kg, Mańǵystaý), Jaıbek Qartabaev (91 kg, Aqtóbe), Nurlan Saparbaı (+91 kg, Túrkistan).
Týrnırge arnaıy kelgen Sıdneı Olımpıadasynyń chempıony Ermahan Ibraımovtyń aıtýynsha, jarys aıasy keńeıe túsip, qatysýshylar sany artyp keledi. Bolashaqta ony AIBA dárejesine jetkizý oılastyrylýda.
Eske sala keteıik, budan buryn Oralda bokstan halyqaralyq týrnırdiń jeńimpazdary anyqtalǵanyn jazǵan bolatynbyz.
