Danııar Eleýsinovtiń jeńisi týraly qandaı pikirler aıtylyp jatyr

ASTANA. QazAqparat - Qazaqstandyq boksshy Danııar Eleýsinov ótken túni Kardıffte kásipqoı rıngtegi úshinshi jeńisine qol jetkizdi. Jeńistiń senimdiligine qaramastan, Eleýsinovtiń óz-ózine kóńiline tolmaǵan. Boksshy Instagram paraqshasynda ár jekpe-jek saıyn joǵary nátıje kórsetip otyrýǵa sóz berdi, dep habarlaıdy QazAqparat tilshisi.

Eleýsinov kásipqoı rıngte úshinshi ret jáne qaıtyp oralǵaly beri alǵash ret bokstasty. 27 jastaǵy qazaqstandyq 30 jastaǵy vengrııalyq Gabor Gorbıchti upaı boıynsha artqa tastap, jeńimpaz atandy.

Eske salaıyq, Danııar Eleýsinovtiń kezekti qarsylasynyń esimi belgili bolǵannan keıin Gorbıchtyń burynǵy qarsylastary vengrııalyq boksshynyń sporttaǵy deńgeıine qatysty pikir bildirgen edi. Osylaısha, reseılik Sergeı Lýbkovıch vengrııalyq sportshyny «myqty qap» dep atasa, ózbek Shahram Gııasov Gorbıchty nokaýtqa jiberý ońaıǵa soqpaıtynyn aıtty. Baıqanamyzdaı, Gııasovtyń sózi rastaldy.

Danııar Eleýsinovtiń eki aıdan keıin budan da joǵary nátıje kórsetýge múmkindigi bar. Boksshynyń promoýteri Eddı Hırn brıtandyq BAQ-qa suhbat berý kezinde Eleýsinovtiń kelesi jekpe-jegi qazan aıynda AQSh-ta ótetinin jetkizdi, dep habarlaıdy «SPORTINFORM» SAA.

«Danııar qarsylasyn nokaýtqa túsire almaǵany úshin qatty ókinedi. Degenmen, jekpe-jektiń ekinshi bóliminde Eleýsinov jaqsy oıyn kórsetti dep oılaımyn. Biz oǵan kásipqoı boksqa beıimdelýge ýaqyt berýimiz kerek», - dedi Hırn.

Qazaqstandyq jankúıerler boksshynyń Instagram paraqshasynda quttyqtaýlar jazyp, jelini bir dúrliktirdi. Keıbir bokssúıer qaýym nokaýttyń bolmaǵanyna tańdanys bildirip jatsa, ózge jankúıerler «Danııardyń nokaýter emes, sýpertehnıkalyq boksshy ekenine kóný kerek» dep jaýap berýde.