Danııar Eleýsinovtiń kezekti jekpe-jegi qashan ótetini belgili boldy

ASTANA. QazAqparat - Jartylaı salmaqtaǵy kásipqoı boksshynyń kelesi jekpe-jeginiń qashan jáne qaı qalada ótetini belgili boldy. Bul týraly Danııar Eleýsinov QazAqparat tilshisine bergen suhbatynda málim etti.

«Kásibı bokstaǵy kelesi jekpe-jegimdi 2019 jyldyń aqpan aıynda Londonda ótkizýdi josparlap otyrmyn. Qarsylasymnyń kim ekeni ázirge belgisiz. Ol meniń salmaǵymdaǵy boksshylardyń reıtıngisi boıynsha anyqtalady. Degenmen kimmen judyryqtasatynym jýyq arada belgili bolady», - dedi D.Eleýsinov.

Onyń aıtýynsha, boksshy búginde qyzý daıyndyq ústinde jáne basty maqsaty otandyq bokstyń damýyna barynsha óz úlesin qosý.

Sonymen qatar, D.Eleýsinov kásibı rıngtegi reıtıng joǵarylaǵan saıyn jaýapkershiliktiń de arta túsetinin aıtyp ótti.

Buǵan deıin belgili boksshynyń aldaǵy jyly jazda 10 raýndyq kezdesý ótkizetinin habarlaǵan bolatynbyz.