Danııar Eleýsinovtiń kásibı rıngtegi úshinshi aıqasy ótedi

ASTANA. QazAqparat - Qazaqstandyq boksshy Danııar Eleýsinovtiń (2-0, 1 KO) múddesin qorǵaıtyn Matchroom Boxing promoýterlik kompanııasy onyń profı-rıngtegi úshinshi aıqasy týraly jarııalady, dep habarlaıdy QazAqparat Sports.kz saıtyna silteme jasap.

«Danııar Eleýsinov 4 tamyz kúni Kardıffte Gabor Gorbıchpen judyryqtasady!», - dep jazdy Tvıtterde Matchroom Boxing.

Eske salaıyq, 30 jastaǵy vengr boksshysy Gabor Gorbıch (24-11, 14 KO) Eleýsinovpen Londonda 6 shilde kúni kezdesýi tıis bolatyn. Alaıda Gorbıchtiń qabaǵynyń jarylýyna baılanysty jekpe-jek ótpedi. Biraq ol jaraqatynan aıyqqannan keıin qazaqstandyq qarsylasymen kezdesýge ýáde etken edi.  

6 shilde kúni Londondaǵy York Hall kesheninde Danııar Vengrııanyń ózge boksshysy Zoltan Shabomen (24-12, 10 KO) kezdesken edi. Aıqas tóreshilerdiń biraýyzdy sheshimimen otandasymyzdyń senimdi jeńisimen aıaqtaldy.