Danııar Eleýsinovtiń ákesi: Ulymnyń talabyn qaıtarǵym kelmedi
ASTANA. QazAqparat - Rıo Olımpıadasynyń chempıony Danııar Eleýsinovtiń ákesi Marat Eleýsinov ulynyń kásipqoı boksqa aýysý týraly sheshimine qatysty pikir bildirdi, dep habarlaıdy «QazAqparat» HAA tilshisi.
«Olımpıadadan keıin ulymnyń kásipqoı boksqa aýysýyn qalamadym. Biraq, bul onyń tilegi... Shynynda da, ol áýesqoı boksta barlyq tıtýldardy jeńip aldy - Azııanyń eki dúrkin chempıony boldy, Olımpıada chempıony atandy. Sondyqtan, ulymnyń talabyn qaıtarǵym kelmedi. Ol kásipqoı boksshy bolǵysy keldi, maqsatyna jetti», - dedi Marat Eleýsinov Astanada ótken baspasóz máslıhatynda.
Aıta ketsek, baspasóz máslıhatynda boksshy Nıý-Iorkte jattyǵatynyn, jattyǵý barysynda ákesi árdaıym qasynda bolatynyn aıtqan bolatyn.
Eske sala ketsek, búgin Danııar Eleýsinovtiń kásipqoı bokstaǵy promoýteri belgili boldy. Boksshymyzdyń promoýteri brıtandyq Eddı Hırn. Eddı Hırn sýper aýyr salmaqta WBA Super, IBF jáne IBO nusqasy boıynsha álem chempıony Entonı Djoshýanyń (20-0, 20 KO), jeńil salmaqtaǵy WBA Super jáne IBF chempıony Raıan Barnet (18-0, 9 KO), jartylaı orta salmaqtaǵy IBF nusqasy boıynsha burynǵy álem chempıony Kel Brýk (37-2, 26 KO) pen orta salmaqtaǵy WBA nusqasy boıynsha burynǵy chempıony Denıel Djeıkobstyń (33-2, 29 KO) promoýteri bolyp tabylady.
