Danııar Eleýsinovti álemniń absolıýtti chempıony jattyqtyratyn boldy
ASTANA. QazAqparat -Tanymal qazaqstandyq boksshy Danııar Eleýsinovti kásibı boksta jartylaı orta salmaqtaǵy burynǵy absolıýtti álem chempıony Korı Spınks jattyqtyratyny belgili boldy.
Bul týraly boksshynyń menedjeri Zııa Álıev Sports.kz-ke bergen suhbatynda aıtty.
«Djon Djeksonnyń jumysbastylyǵyna baılanysty jartylaı orta salmaqtaǵy burynǵy absolıýtti álem chempıony Korı Spınksti shaqyrý týraly sheshim qabyldadyq. Myqty boksshylardyń bári jaqsy jattyqtyrýshy bola bermeıdi jáne kerisinshe. Eleýsinov kelgen alǵashqy kúnnen bastap Korı Danııardyń ákesimen birge ony aldaǵy aıqasqa daıyndap jatyr. Biz jattyqtyrýshy retinde kimdi tańdarymyzdy bilmedik, sońynda Korıge toqtaldyq», - dedi maman.
