Danııar Eleýsinovke qarsylas qandaı krıterıılermen tańdalady
ASTANA. QazAqparat - Menedjer Zııa Álıev Danııar Eleýsinov úshin kelesi qarsylasty tańdaý kezinde qandaı qaǵıdalardy ustanatynyn aıtty, dep habarlaıdy «SPORTINFORM» SAA «KZ boks álemine» silteme jasap.
Eleýsinovtiń komandasy 28 shildege úshinshi qarsylasty izdep jatyr. Jekpe-jek Londonda tanymal O2-arenada ótedi. Ony Danııardyń promoýteri Eddı Hırn vengrııalyq Zolton Shebony jeńgennen keıin málim etken bolatyn. Zııa Álıev Londonda ótetin boks keshine qarsylasty tańdaýdaǵy basymdyqtardy atady.
«Danııardyń kásipqoı bokstaǵy úshinshi jekpe-jegine qarsylastar izdep jatyrmyz. Yqtımal úmitkerlerdiń stıline, jekpe-jektegi agressııalyǵyna, olardyń rekordyna - qansha aıqasta jeńip, qansha jekpe-jekte jeńilgenine mán beremiz. Jarty álem jeńip tastaǵan boksshylar da qajet emes. Túrli stıldegi boksshylardy izdeýge tyrysyp jatyrmyz. Debıýtant bolǵan alǵashqy qarsylas shabýyldaǵandy, Danııardyń aldynda turǵandy jaqsy kóretin. Ekinshisi, ózderińiz kýá bolǵandaı, aıaǵymen jıi qozǵalyp, kenet tap bergendi unatty. Ártúrli qarsylastardy izdep jatyrmyz», - dep túıindedi Álıev.
Eske salaıyq, Danııar Eleýsinov Shebony jeńgennen keıin Qazaqstanǵa qaıtyp keldi. Onyń promoýteri Eddı Hırn Qazaqstannyń Olımpıada chempıony mıllıon dollar tabatynyn málim etti. Ol úshin «Golovkınniń qateligin qaıtalamaýy kerek», dep esepteıdi bas bapker Álimhanuly.
