Danııar Eleýsinov jekpe-jek ótkizgisi keletin chempıondardyń gonorary qansha

ASTANA. QazAqparat - ESPN telearnasy amerıkalyq boksshy Terens Kroýford (32-0, 23 KO) pen Avstralııa ókili Djeff Hornǵa (18-0-1, 12 KO) aldaǵy kezdesý úshin qansha tólenetinin jarııalady, dep habarlaıdy Sports.kz.

Jartylaı orta salmaqqa aýysqan Kroýford WBO tujyrymynyń chempıony Hornmen búgin tańerteń Las-Vegastaǵy MGM Grand arenasynda kezdesedi. Osy kezdesý úshin Terenske kelisimshart boıynsha 1,75 mıllıon dollar tólenedi, al Top Rank promoýterlik kompanııasy taǵy da 3 mıllıon dollarlyq tólemaqyǵa kepildik berip otyr. Al Hornnyń resmı gonorary 500 myń dollar, budan bólek taǵy da 1,25 mıllıon dollar mólsherindegi tólemaqy kepildengen.

Eske sala keteıik, qazaqstandyq boksshy Danııar Eleýsinov (2-0, 1 KO) te jartylaı orta salmaqta óner kórsetedi. Taıaýda ǵana bergen suhbattarynyń birinde dıvızıon chempıondary Kroýford jáne Hornmen judyryq túıistirgisi keletinin málimdegen bolatyn. Al amerıkalyq boksshy Eleýsinovti rıngte esinen tandyratynyn aıtqan.