Danııar Eleýsinov: Ulttyq quramaǵa kelmeı turyp oılanyp alýym kerek
ASTANA. QazAqparat - Rıo-de-Janeıro olımpıadasynyń chempıony Danııar Eleýsinov bokstan Qazaqstan ulttyq quramasyna qaıta kelý-kelmeý máselesin áli sheshpegenin aıtty, dep habarlaıdy QazAqparat tilshisi.
«Ulttyq quramaǵa qaıta kelý-kelmeý máselesin áli sheshken joqpyz. Áli de oılaný ústindemiz. Biraq burynǵy kelisim jasaǵan kompanııa bizdi aldap soqqanyn osyǵan deıin tilshilerge aıttyq. Olardan birjola qol úzdik. Biraq, basqa da túsip jatqan usynystar bar. Ulttyq quramaǵa qaıta kelmes buryn jaqsyraq oılanyp alýymyz kerek», - dep atap ótti Danııar Eleýsinov.
Esterińizge sala keteıik, osyǵan deıin Danııar Eleýsinov QazAqparat tilshisine bergen suhbatynda Ulttyq quramaǵa qaıta kelýi múmkin ekenin aıtqan bolatyn. Oǵan basty sebep, Avstralııalyq MJA Entertainment promoýterlik kompanııasy bergen ýádelerinen taıyp, boksshylardy kásipqoı bokstaǵy sharshy alańǵa shyǵarmaǵan.
