Danııar Eleýsinov salmaq ólsheý rásiminen ótti

ASTANA. QazAqparat - Qazaqstandyq boksshy Danııar Eleýsinov (4-0, 2 KO) nıkaragýalyq Karlos Mohıkamen (16-2-2, 12 KO) kezdesýi aldynda salmaq ólsheý protsedýrasynan ótti, dep habarlaıdy QazAqparat Sports.kz saıtyna silteme jasap.

Eleýsinovtiń salmaǵy 147,7 fýnt (67 kg) boldy, al Mohıka - 146 fýnt (66,22 kg) shyqty.

Búgin qazaqstandyq boksshy Astanadaǵy Ortalyq kommýnıkatsııalar qyzmetine jınalǵan BAQ ókilderimen Monakodan vıdeobaılanys arqyly qosyldy. Ol óziniń qarsylasy óte tájirıbeli ári myqty ekenin atap ótti.

Eleýsinov-Mohıka jekpe-jegin «Habar» telearnasy tikeleı efırden kórsetedi. Aıqas qarashanyń 24-inen 25-ine qaraǵan túni «Kazıno de Monte-Karloda» ótedi. Bul keshtiń basty aıqasy alǵashqy aýyr salmaqtaǵy burynǵy álem chempıony reseılik Denıs Lebedev (31-2, 23 KO) pen amerıkalyq Maık Ýılson (19-0, 8 KO) arasynda ótedi. Hedlaınerler asa jeńil salmaqtaǵy Halıd ıAfaı (24-0, 15 KO) men Israel Gonsales (23-2, 10 KO) bolmaq.

Eske salaıyq, Danııar Eleýsinov kásipqoı bokstaǵy tórtinshi aıqasyn 20 qazanda Boston (AQSh) qalasynda ótkizgen bolatyn. Sonda jergilikti Mett Doertıdi (8-6-1, 4 KO) birinshi raýndta-aq nokaýtqa jiberdi.

Al Karlos Mohıka sońǵy ret 14 sáýirde rıngke shyqty. Ol ekinshi raýndta jerlesi Elvısti Ramıresti (7-18, 2 KO) nokaýtpen jeńdi.