Danııar Eleýsinov kelesi jekpe jegine daıyndalyp jatyr

NUR-SULTAN. QazAqparat - Qazaqstandyq kásipqoı boksshy, jartylaı orta salmaqtaǵy IBF InterContinental tıtýlynyń ıegeri Danııar Eleýsinov (10-0, 6 KO) aldaǵy jekpe-jekke daıyndyǵyn bastap ketti. Bul týraly QazAqparat Olımpıada chempıonynyń Instagram paraqshasyna silteme jasap habarlaıdy.

«Qazaq naızaǵaıy» Danııar Eleýsinov óziniń Instagram paraqshasynda sparrıngten sýret jarııalady. Sýretke qarap, onyń sporttyq babynda bolý úshin týǵan elinde júrse de jattyǵýdan bas almaıtynyn kórýge bolady. Buǵan deıin boksshy kelesi jekpe-jegi 8 mamyrda Saýl «Kanelo» Alvares pen Bıllı Djo Sonders jekpe-jeginiń anderkardynda ótýi múmkin ekenin aıtqan bolatyn. Sońǵy ret 27 qarashada AQSh-ta ótken jekpe-jekte Danııar Eleýsinov álemniń eks-chempıony namıbııalyq Djýlıýs Indongony (23-3, 13 KO) ekinshi raýndta nokaýtqa jibergen edi.