Danııar Eleýsinov qazaqstandyq jankúıerlerimen qoshtasty
ASTANA. QazAqparat - Rıo Olımpıadasynyń chempıony Danııar Eleýsinov shetelge attanardyń aldynda áýesqoı boksshy retinde sońǵy avtograf-sessııasyn ótkizdi, dep xabarlaıdy QazAqparat tilshisi Qazaqstannyń boks federatsııasyna silteme jasap.Astanada ótken sharaǵa Danııardyń kóptegen jankúıerleri keldi. Olar kásibı boksqa aýysyp jatqan boksshyǵa sáttilik tilep, qoltańbasyn jazdyrtyp aldy.
«Menińshe kásibı boksta Danııar úlken jetistikterge jetedi. Sebebi ol - daryndy sportshy. Eń bastysy, ol Qazaqstannyń Týyn jelbiretip, el namysyn qorǵaıdy. Biz bolsaq, oǵan árqashan jankúıer bolyp, qoldaý bildiretin bolamyz. Sportshy úshin jankúıerdiń qoldaýy, óz Otanynda onyń jeńisin asyǵa kútip jatqan xalyqtyń bolǵany mańyzdy ǵoı», - deıdi Ásel esimdi jankúıer.
Aıta keteıik, buǵan deıin jýrnalısterge suxbat bergen Danııar Eleýsinov AQSh-qa ketetin ýaqyty áli de belgisiz ekenin jetkizgen. Sondaı-aq ózine qatysty «Amerıkaǵa kóship barady» degen aqparatty joqqa shyǵardy.
«Meni Amerıkaǵa kóship barady dep aıtylyp jatyr. Negizi, ol durys aqparat emes. AQSh-qa kóship barǵaly jatqanym joq. Amerıkaǵa barǵan kúnniń ózinde, tek daıyndyqqa ǵana baryp otyramyn. Al jekpe-jekterden keıin elime oralamyn. Sebebi básekelerdiń kóbi Qytaıda - Beıjiń, Shanxaı men Gongkongte ótetin bolady. Amerıkada kásibı boks jaqsy damyǵannan keıin sol jerde daıyndalǵandy jón kórdik. Qasymda bolsyn, balam kóz aldymda júrsin dep, daıyndyq kezinde otbasymdy alyp ketetinimdi aıtqan bolatynmyn. Biraq túbegeıli kóship bara jatqan joqpyn», - dedi ol.
