Danııar Eleýsinov kásipqoı bokstaǵy qadamyn sátti bastady - sheteldik BAQ

ASTANA. QazAqparat - Boxingscene.com saıty 2018 jyldy qorytyndylaı otyryp, qazaqstandyq boksshy Danııar Eleýsinovtyń (5-0, 3 KO) kásipqoı bokstaǵy qadamyn sátti bastaǵanyn atap kórsetti, dep habarlaıdy Sports.kz.

Redaktsııa 2018 jyldyń úzdik prospektisi retinde 20 jastaǵy amerıkalyq boksshy, jeńil salmaqta óner kórsetetin Devın Heınıdi (20-0, 13 KO) atap kórsetti. Al Eleýsinov osy tizimde ekinshi oryndy ıelendi.

«2016 jylǵy Olımpıada chempıony Danııar Eleýsinov 28 sáýir kúni debıýtin toılap, bıyl kásipqoı bokstaǵy qyzmetin zor ekpinmen bastady. Besinshi kezdesýinde myqty solaqaı boksshy Eleýsinov nıkaragýalyq Markos Mohıkany nokaýtqa jiberdi», - dep jazady Boxingscene.com.

Eske sala keteıik, boksshy kásipqoı bokstaǵy bes jeńisiniń úsheýin nokaýtpen aıaqtady.