Danııar Eleýsinov kásipqoı bokstaǵy birinshi jekpe-jegin Qytaıda ótkizedi
ASTANA. QazAqparat - Keshe Olımpıada chempıony Danııar Eleýsinovtiń kásipqoı boksqa aýysqany belgili boldy. Alǵashqy jekpe-jegin Qytaı jerinde ótkizedi. Bul týraly «Fighnews.com» portalyna silteme jasap, massaget.kz saıty habarlady.
Qazaqstandyq boksshy kásipqoı bokstaǵy alǵashqy jekpe-jegin mamyr aıynda ótkizbek. «MJA Entertainment's» promoýterlik kompanııasy basshysy Maık Altamýrdyń aıtýynsha birinshi kezdesýin Pekınde uıymdastyrý josparlanyp otyr eken. Ol Danııardy eki jyl ishinde álem chempıony atandyrǵysy keledi.
- Bizdiń jospar boıynsha Danııar Eleýsinov ekinshi jáne úshinshi jekpe-jekterinde-aq qurlyqtyq chempıondyq ataqtarǵa talasatyn bolady. Al eki jyl ishinde álem chempıony atanamyz. Ol 18 aı ishinde kásipqoı boksta shyńdalyp, eki jyldan keıin chempıondyq ataq úshin jekpe-jekke shyǵatynyna senimdimin. Danııar qarymta soqqy jasaýda asa jyldam. Onyń boıynda ataqty boksshylarǵa tán senimdilik bar. Ol eshteńeden qoryqpaıdy, - dedi Maık Altamýr.
Danııar Eleýsinovtiń kásipqoı bokstaǵy jeke jattyqtyrýshysy retinde ákesi Marat Eleýsinov qadaǵalaıtyn bolady. Al aqpan aıynda resmı túrde qol qoıatyn «MJA Entertainment's» promoýterlik kompanııasynyń jattyǵý lageri Florıdada (AQSh) ornalasqan. Qazaqstandyq boksshyny ákesinen bólek amerıkalyq jattyqtyrýshylar da jattyqtyratyn bolady.
Aıta keteıik, Danııar Eleýsinovtiń aǵasy Dáýren Eleýsinov ta kásipqoı boksta el namysyn qorǵap júrgen boksshylarymyzdyń biri. 2014 jyldan beri alty jekpe-jek ótkizip, beseýinde jeńiske jetti. Bir jekpe-jeginde qarsylasymen teń tústi. Dáýren de jaqyn ýaqytta Danııar baq synaıtyn promoýterlik kompanııamen kelisimge kelmek.
