Danııar Eleýsinov: Golovkınnen asyp túskim keledi
ASTANA. QazAqparat - Kásipqoı bokstaǵy mansabyn jeńispen bastaǵan olımpıada chempıony Danııar Eleýsinov (1-0, 1 KO) WBA/WBC/IBF tujyrymdary boıynsha álem chempıony Gennadıı Golovkınnen de joǵary jetistikke jetkisi keletinin aıtty, dep habarlaıdy Sports.kz.
«Golovkındi Qazaqstanda kópshilik tanıdy. Álemde Qazaqstan týraly aıtsań, birden GGG eske túsedi. Bul da meniń maqsattarymnyń biri. Men de Qazaqstan týraly aıtylǵan jerde atymnyń atalǵanyn qalaımyn. Golovkın bizdiń eldegi barlyq sportshy úshin jol ashty, men de sonyń izimen júrýdi qalaımyn», - deıdi boksshy.
«Biraq meniń jolym basqa, men odan da ozýdy qalaımyn. Men álemniń jeńilmeıtin, absolıýttik chempıony bolýdy armandaımyn. Eń aldymen, elimniń dańqyn asqaqtatqym keledi, ol meniń basty maqsatym», - deıdi D. Eleýsinov.
Eske sala keteıik, Danııar Eleýsinovtiń kelesi qarsylasy 30 jastaǵy Gabor Gorbıch (24-11, 14 KO) bolady. Jartylaı orta salmaqta ótetin kezdesý 6 raýndqa sozylmaq. Boksshylar 6 maýsym kúni Londondaǵy (Ulybrıtanııa) York Hall kesheninde Loýrens Okolı (8-0, 6 KO) - Lıýk Ýotkıns (13-0, 9 KO) kezdesýiniń anderkartynda ótedi.
