Danııar Eleýsinov: Bıylǵy basty maqsat - Olımpıada joldamasyna qol jetkizý
ASTANA. QazAqparat - 2013 jylǵy bokstan álem chempıony, Azııa Oıyndarynyń eki dúrkin jeńimpazy, QR ulttyq quramasynyń kapıtany Danııar Eleýsinov bıylǵy maýsymdaǵy basty josparlarymen bólisti, dep jazady boxingnews.kz.
«Bıyl lıtsenzııalyq jyl ekenin bilesizder, sondyqtan basty maqsat - Olımpıada joldamasyn jeńip alyp, dúbirli dodada úzdik óner kórsetý. Budan bólek, Búkilálemdik boks serııasy (WSB) bar. Onda ulttyq qurama «Astana Arlandaryna» kómektesetin bolady. Jalpy jyl boıy jumys kóp», - deıdi ol.
Danııardyń aıtýynsha, jaqynda bapkerler onyń WSB rıngine qashan shyǵatynyn talqylaıtyn bolady.
«Arlandardyń» qatarynda qashan shyǵatynymdy bapkerler toby sheshedi. Ulttyq quramanyń bas bapkerimen, klýb jattyqtyrýshysymen jáne jeke bapkerimmen aqyldasýym qajet. Ortaqtasa otyryp, sheshim jasaımyz», - dedi Danııar.
Kásipqoı boksqa kóshý jaıly saýal qoıylǵanda, boksshy bul týraly Rıo-de-Janeırodaǵy Olımpıadadan keıin oılanatynyn aıtty.
«Men ol týraly 2016 jylǵy Olımpıada oıyndarynan keıin oılanamyn. Tórtjyldyqtyń basty básekesine joldama alyp, onda jasyndaı jarqyldasam deımin. Qazir naqty aıta almaımyn. Oılanǵanym ras, biraq kóptegen faktorlar bar, densaýlyq shamasyna da qaraý kerek. Kóremiz», - dep atap ótti boksshy.
