Danııar Eleýsinov álemdi moıyndatady - promoýter
ASTANA. QazAqparat - Qazaqstandyq boksshy Danııar Eleýsinov AQSh-taǵy debıýttik jekpe-jegi qarsańynda ashyq jattyǵý ótkizdi, dep habarlaıdy «SPORTINFORM» SAA.
Buǵan deıin habarlanǵandaı, Olımpıada chempıony Danııar Eleýsinovtiń qarsylasy amerıkalyq Noı Kıdd (3-0-1,2KO) bolady. Boksshylardyń jekpe-jegi 28 sáýirde Brýklındegi «Barclays Center» arenasynda ótedi.
Ashyq jattyǵý kezinde Danııar Eleýsinov AB BOXING NEWS-tyń sheteldik YouTube arnasynyń tilshisine kásibı boksqa kelýi jáne bolashaqtaǵy josparlary týraly oılaryn aıtyp berdi.
- Nıý-Iorktegi kásibı bokstaǵy alǵashqy debıýtińiz týraly ne aıtasyz?
- Nıý-Iork - kásibı bokstyń «Mekkesi», bári osy jerden bastalady. Men osynda júrgenime qýanyshtymyn jáne bul jerde alǵashqy kásibı debıýtimdi ótkizetinim tipten keremet.
- Áýesqoı bokstan kásipqoı boksqa aýysý kezeńi qalaı ótedi?
- Shynymdy aıtsam, men boksty jaqsy kóremin. Maǵan jattyǵý protsesi, uıymdastyrý kezeńi qatty unaıdy. Kásibı boks - eń aldymen óte úlken shoý. Áýesqoı boksta mundaı bolmaıdy.
- Qalaı oılaısyz, Qazaqstannan shyqqan kelesi álem chempıony ataný úshin sizge qansha ýaqyt kerek bolady?
- Men óte jyldam, biraq júıeli túrde josparlap otyrmyn. Múmkin kelesi jyly bolyp qalar.
Eleýsinovtiń promoýteri Eddı Hern de óz pikirin bildirdi.
-Sizder bul jigittiń qanshalyqty talantty ekenin áli jetkilikti deńgeıde túsinbeı otyrsyzdar. Ol Gennadıı Golovkın emes, ol Danııar Eleýsinov. Qazirgi ýaqytta ol Qazaqstannyń «altyn balasy». Gennadıı Golovkınmen salystyrǵanda, dál qazirgi satyda ol tanymaldyqtyń múlde basqa deńgeıinde. Qazaqstanda ol barlyq plakattardyń aınasyna aınalǵan jigit. Ol keremet talantty jáne ol ortasha salmaq dárejesinde álem chempıony ataǵyna ıe bolady.
- Siz ony qalaı taptyńyz?
- Men ony Zıanyń (Álıev-red.) arqasynda taptym. Ol kezde men jańa boksshylar izdep júrgen edim. Men bul jigitti Olımpıada oıyndarynda telearnadan kórdim. Sol kezde oǵan degen qyzyǵýshylyǵym oıandy. Sóıtip, ol týraly GeeBee týrnırine qatysqan boksshylardan suraı bastadym. Jáne onyń kim ekenin bildim
Sodan keıin men Qazaqstanǵa kelip, ekeýmiz kelisimshartqa qol qoıdyq. Endi ol AQSh, Ulybrıtanııa, Monakoda bokstasady. Danııardyń kóp uzamaı álemdik boks jankúıerleriniń júrekterin jaýlap alatynyna senemin, - dedi Eddı Hern.
Aýdarma: Abaı Abylaıuly
