Danııar Áshimbaev Joldaý jaıly: Naqty ispen aınalysýǵa arnalǵan jospar

ASTANA. QazAqparat – Memleket basshysy Qazaqstan halqyna Joldaýyn jarııalaı otyryp, Úkimetke qatelikterden sabaq alyp, eldiń áleýmettik-ekonomıkalyq damýyna negiz bolatyn naqty túıtkilderdi sheshýdi tapsyrdy. Mundaı pikirdi saıasattanýshy Danııar Áshimbaev bildirdi, dep habarlaıdy QazAqparat tilshisi.

«Prezıdent uzaq merzimdi strategııadan bas tartý oryndy dep sanaıdy. Óıtkeni, Úkimet olardy oryndaı alatyn jaǵdaıda emes. Josparlaý júıesi ózgertilip, uzaq merzimdi josparlardyń ornyna mindetterdi sheshý 3 jylǵa qysqartylady. Barlyq tapsyrmalar oryndaldy dep berilgen Úkimettiń esepterin salystyra otyryp, Prezıdent olardyń tek sóz júzinde qalǵanyn eske saldy. Bul – shaǵyn jáne orta bıznesti qoldaý, bazalyq salalardy jańǵyrtý, aýyl sharýashylyǵy, ónimdi tereń óńdeý, energetıka salasyndaǵy jumystardy qaıta qaraý. ıAǵnı, Úkimet barlyq mindetterdiń oryndalǵany týraly únemi esep beredi, al búgin Prezıdent bul mindetterge qaıta oraldy. Shyn máninde ol jumystar tek plakat betterinde qalǵan. Sondyqtan bul Joldaýda qurǵaq sóz joq, naqty máselemen aınalysýǵa arnalǵan jospar», - dedi Danııar Áshimbaev.

Saıasattanýshy Joldaýda kóterilgen mańyzdy máselelerdiń biri – sý tapshylyǵy ekenine toqtaldy. Sonymen qatar Danııar Áshimbaev Prezıdenttiń logıstıka, qurylys pen jol sapasyn synǵa alýy oryndy dep sanaıdy.

«Prezıdent eki jańa mınıstrlikti qurý bastamasyn kóterdi. Bul – Kólik jáne Sý mınıstrlikteri. Atalǵan ıdeıanyń máni tereńde jatyr. Máselege jappaı qaraıtyn, júktemesi kóp mınıstrlikterdiń ornyna mamandandyrylǵan memlekettik organdardyń bolýy mańyzdy», - dedi spıker.

Danııar Áshimbaevtyń paıymynsha, bıylǵy Joldaý naqty isterdiń jospary jazylǵan – mańyzdy qujat. Onyń ár salasy boıynsha aýqymdy jumystar atqarylýy tıis.