Danııar Áshimbaev: Sheteldik sarapshylardy qoıyp, aldymen ulttyq múddeni eskerý kerek
«Beıbit jınalystar týraly» zań óz oıyn bildirgisi keletin azamattarǵa jaqsy múmkindik beretinin aıta ketý kerek. Áleýmettik, ekonomıkalyq nemese saıası máselelerge kelgende mıtıng - narazylyqtyń bir túri retinde burq ete túsetin jaǵdaılar kóp kezdesedi. Álbette kez kelgen másele mıtıngke kelip tirelse bılik óz jumysynda kem-ketik jiberip, ótinimderdi qabyldamaı, adamdarda basqa amal qalmaıtyndaı jaǵdaıǵa ákeldi degen sóz. Osy rette adamdar narazylyqtaryn bildirýge quqyly», - deıdi saıasattanýshy.
Sarapshy bizdiń qoǵamǵa turaqtylyq pen kelisim sekildi qundylyqtar óte mańyzdy ekenin aıtady.
«Qazirgi jaǵdaıda ahýaldy ýshyqtyryp alýdyń aqyry ultaralyq nemese konfessııaaralyq qaqtyǵystarǵa ákep soqtyrýy múmkin. Máselen bul saladaǵy zańdy qabyldaı otyryp, halyqaralyq quqyq normalaryna silteme jasaı bermeı, oryndy oı, paıymdy usynystarǵa qulaq asý kerek. Mıtıngilerde talqylaıtyn jáne talqylaýdy qajet etpeıtin taqyryptar bar. Bizdiń qoǵamda osy máselelerge qatysty radıkaldy jáne tipti agressıvti kózqarastaǵy toptar bar. Sondyqtan belgili bir retteý tártibi bolý kerek. Kóptegen halyqaralyq konventsııalarǵa, kelisimder men sarapshylardyń oıyna silteme jasaı otyryp, jańa zańdy syn sadaǵyna iliktirip jatqandardy kórip otyrmyz. Biraq qazir biz ulttyq zańnama týraly aıtyp otyrmyz. Ol álemdik tájirıbe mysaldaryna negizdelmeýi kerek. Olardy tabý ońaı. Aqylǵa qonymdy iske ıek artqan abzal. Bizdiń qoǵamǵa ne qajet – sol eskerilýi kerek. Frantsııa, Koreıa nemese Pákistanǵa qolaıly zań bizge qajet emes», - dedi Danııar Áshimbaev.
Saıasattanýshynyń paıymyna súıensek, beıbit jınalystar týraly jańa zań aıtarlyqtaı lıberaldy sıpatqa ıe. Sonymen qatar, bul qujat qoǵamǵa orny tolmas shyǵyn keltiretin saıası, ulttyq, dinı radıkalızmniń jolyn kesýge de qaýqarly.
Danııar Áshimbaev túrli toptar men birlestikter qatysqan, jaqynda bolǵan mıtıngilerdiń tolqynyn mysalǵa keltirdi.
Sarapshynyń aıtýynsha bul toptar óz mıtıngilerin jınaýǵa tyryspaı, kerisinshe sheteldegi keıbir adamdar qozdyryp otyrǵan mıtıngilerdi paıdaǵa jaratýǵa tyrysqan. Bul degenimiz atalmysh toptardyń qoǵam qoldaýyn sezinbeıtinin jáne sondyqtan olardy saıası kúsh retinde baıypty qabyldaýǵa bolmaıtyndyǵyn bildiredi. Óıtkeni olar ózdiginen áreket etpeı, saıası arandatýshylyqqa qatysqan adamdarǵa qosylady.
«Men azamattar óz pikirin bildirýge quqyly bolýy kerek dep sanaımyn. Jınalystarda, buqaralyq aqparat quraldarynda, áleýmettik jelilerde... Osyǵan qaramastan bul áreketterdiń keıbirin shektep, tipti jolyn kesip otyrý kerek. EQYU nemese Eýropalyq parlamenttiń keıbir sarapshysy buǵan kelispeýi múmkin. Biraq bul bizdiń memleketimiz. Biz oǵan jaýaptymyz. Birinshi kezekte bizdiń qoǵamnyń múddesin eskerý kerek», - deıdi D.Áshimbaev.
