Danııar Aqyshev: Makroekonomıkalyq saıasat syrtqy kúızelisterge barynsha ornyqty boldy
ASTANA. QazAqparat - QR Ulttyq bankiniń tóraǵasy Danııar Aqyshevtiń paıymynsha, Qazaqstannyń makroekonomıkalyq saıasaty syrtqy kúızelisterge qatysty barynsha ıkemdi ári ornyqty boldy, dep habarlaıdy QazAqparat Ulttyq banktiń baspasóz qyzmetine silteme jasaı otyryp.
Seısenbi kúni Almatyda QR Ulttyq bankimen 2015-2017 jyldardaǵy qarjylyq turaqtylyq boıynsha esep tanystyryldy. Atalǵan esep qarjylyq turaqtylyqty qamtamasyz etý turǵysyndaǵy mandat aıasynda daıarlandy.
«Bul esepte qarjylyq turaqtylyqqa arnalǵan keıbir tásilderimizdi qaıta qaraımyz. Ol makroekonomıkalyq saıasatqa, sol sııaqty qarjylyq retteý saıasatyna da qatysty», - dedi D. Aqyshev.
Onyń sózine qaraǵanda, QR Ulttyq banki ekonomıkalyq saıasatta, qarjylyq damýda, qadaǵalaý men retteý tetikterinde óziniń rólin júıeli túrde qaıta qaraý qajettiligi týyndaǵan jalǵyz ortalyq bank emes. Jahandyq qarjylyq daǵdarystan keıin ortalyq bankterde ǵana emes, qarjylyq qyzmettiń birneshe salalarynda paradıgma birtindep aýysty.
«Jahandyq daǵdarystan keıingi segiz jyldan keıin qarjylyq eseptilik standarttary jónindegi halyqaralyq uıymdar qarjy quraldaryn baǵalaý tásilderin ózgertti. Kútiletin shyǵyndardy baǵalaýdyń retteýish ádisteri qarjylyq eseptilik standarttaryna jaqyn keldi. Táýelsiz aýdıtorlar ınstıtýtynyń olıgopolızatsııasymen baılanysty táýekelder barynsha kórinip tur, biraq tıesili tıimdi sheshim áli de tabylmaı otyr», - dedi D. Aqyshev.
UB basshysy kún tártibimen qosa qarjylyq turaqtylyq týraly esep boıynsha ozyq tájirıbe de ózgergenin sóz etti. Olar el ereksheligine, táýekelder ereksheligine basa nazar aýdara bastady, esepter barynsha jınaqy boldy.
«Retteýshiniń tıimdi áreketteri qarjy júıesiniń problemalaryn tolyq túsiný kezinde ǵana múmkin. Qazaqstanda bul mindet kredıttik táýekelderdi jáne bank aktıvteriniń sapasyn baǵalaýdyń qalypty ádisteri paıdaly bolmaǵandyǵymen kúrdeli boldy. Mundaı jaǵdaıda taldaýǵa táýekelder oryn alǵan jerlerde retteletin qarjy uıymdaryn ǵana emes, sonymen qatar eseptilik pen retteý júıesin qosa alǵanda, qarjy júıesiniń basqa da bólikterin qamtý oryndy bolady. Biz prýdentsııalyq quraldardy ǵana emes, banktiń jaı-kúıi týraly eseptilikti jasaý qaǵıdattaryn da qaıta qaradyq», - dep naqtylady D. Aqyshev.
Ol makroekonomıkalyq saıasat syrtqy kúızelisterge qatysty barynsha ıkemdi ári ornyqty boldy dep tolyqtyrdy. Qazaqstan úshin belgilengen aıyrbastaý baǵamymen baılanysty táýekelder bank júıesi men búkil ekonomıka úshin mańyzdy táýekelderdiń biri boldy.
D.Aqyshev 2015 jyly erkin aıyrbastaý baǵamyna ótý ekonomıkanyń syrtqy kúızelisterge osaldyǵyn tómendetkenin, sondaı-aq makroekonomıkalyq saıasattyń ıkemdiligin arttyrǵanyn, teńgege senimdi qalpyna keltirgenin, dollarlandyrýdy tómendetkenin, paıyzdyq mólsherlemelerdi basqarý úshin jáne ınflıatsııalyq targetteý úshin múmkindikterdi ashqanyn atap ótti. Esep ıkemdi aıyrbastaý baǵamynyń obektıvti qajettiligin jáne belgilengen baǵamǵa baılanysty qarjylyq turaqtylyq táýekelderin kórsetedi.
