Danııar Aqyshev: Maǵan jumys jasaýǵa eshkim kedergi keltirgen joq
ALMATY. QazAqparat - QR Ulttyq bankiniń tóraǵasy Danııar Aqyshev málim etkendeı, onyń jumys jasaýyna eshkim kedergi keltirmegen, dep habarlaıdy «QazAqparat» HAA tilshisi.
Almatydaǵy baspasóz máslıhaty kezinde jýrnalıster Úkimettiń keńeıtilgen otyrysynda Prezıdent Nursultan Nazarbaevtyń Danııar Aqyshevty eshkimnen qoryqpaýǵa shaqyrǵanyn eske saldy. Osyǵan oraı, Ulttyq banktiń basshysyna oǵan kimniń kedergi keltirgeni týraly suraq qoıyldy.
«Joq, jumys jasaýǵa eshkim kedergi keltirgen joq. Bank jumysynyń nátıjesi - biliktiligi joǵary mamandardyń qajyrly eńbeginiń jemisi. Biz óz jumysymyzdy adal ári durys atqarýdamyz. Ekonomıkalyq úderis jaǵdaıynda barlyǵy oıdaǵydaı bola bermeıdi», - dep jaýap berdi Aqyshev.
Eske sala keteıik, 3 aqpan kúni ótken otyrysta QR Prezıdenti Nursultan Nazarbaev Ulttyq banktiń isine aralasqandardy jazalaý kerektigin atap ótken edi.
