Danııar Aqyshev ıpoteka týraly: Árkim shamasyna qaraýy kerek
«Ipoteka degenimiz - árbir azamattyń óz múmkindigin saralaýy kerektigin bildiredi. Azamat 25 jyl boıy nesıe tólegisi kele me? Iá, stavkany tómendetip, júktemeni azaıttyq. Eger páterdiń baǵasy 10 mıllıon teńge bolsa, tólenýi tıis aılyq tólem 57 myń teńgege teń. Munda sondaı-aq, 2 mln teńgelik alǵashqy jarnany salý kerek. Al alǵashqy jarna berilgennen keıin joǵaryda atalǵan somany 25 jyl boıy tóleý kerek bolady», - dedi Ulttyq bank tóraǵasy Úkimet otyrysynan keıin tilshilerdiń suraǵyna jaýap berip.
Danııar Aqyshev sonymen qatar, mundaı zaımdy resimdeý úshin qajetti azamattardyń tómengi kirisi týraly da sóz qozǵady.
«Ol úshin sizdiń aılyǵyńyz shamamen 112 myń teńge bolýy kerek. Kez kelgen jeke tulǵaǵa nesıe bergen kezde bankter osy tájirıbeni ustanady. Demek, qaryz júktemesi azamattardyń aılyǵynyń 50 paıyzynan aspaýy tıis. Bolmaǵan jaǵdaıda álgi adam bar aqshasyna qaryzyn japsa, ózi qalaı ómir súredi? Meniń oıymsha, adamdar óz múmkindigin naqty esepteı alatyndaı óte yńǵaıly amal usynylyp otyr», - deıdi QR Ulttyq bank tóraǵasy.
Sóz sońynda Danııar Aqyshev árbir azamatty óz múmkindigin jiti eseptep, saraptap alýǵa shaqyrdy.
«Keleshekte másele týyndamastaı sheshim qabyldanýy kerek degen oıdamyn. Adamdar qaryzdy alýyn alyp, keıin «tóleı almaı jatyrmyz, qandaı da bir jeńildik kórsetseńizder» demeıtindeı bolmaýy tıis. Ulttyq bank Memleket basshysynyń aýzynan shyqqan jeńildikterden basqa eshbir jeńildikti engizip otyrǵan joq», - dedi Danııar Aqyshev.
Eske sala ketsek, buǵan deıin Úkimet otyrysynda Danııar Aqyshev «7-20-25» baǵdarlamasy boıynsha Astanaǵa jaqyn aımaqtarda ıpotekanyń shekti baǵasy kóterilgenin málim etken bolatyn.
