Danııar Aqyshev: Inflıatsııalyq targetteý qaǵıdattaryna ótý - qısyndy qadam
ALMATY. QazAqparat - Ótken jyldardyń tájirıbesi Qazaqstan ekonomıkasy úshin aqsha-kredıt saıasatynyń barynsha qolaıly rejimin aıqyndaýǵa múmkindik berdi. Bul jóninde Qazaqstan Ulttyq Bankiniń Tóraǵasy Danııar Aqyshev Qazaqstan qarjygerleri VIII kongresiniń sessııasynda sóz sóıleý barysynda aıtyp berdi, dep habarlaıdy QazAqparat tilshisi.
Ol aqsha naryǵyndaǵy operatsııalarǵa basymdyq berý - bizdiń qarjy naryǵynyń kemeldengeniniń belgisi dep atady.
Onyń aıtýynsha, ınflıatsııalyq targetteý qaǵıdattaryna ótý - bul qısyndy qadam. Ony ashyq ekonomıkasy bar kez kelgen el erte me, kesh pe júzege asyrýǵa tıis bolǵan.
«Inflıatsııa boıynsha nysanaly baǵdarlarǵa jetý zańda aıqyndalǵan, basqa elderdiń tájirıbesi jáne kóptegen ortalyq bankterdiń praktıkasynda dáleldengen basymdyq. Sońǵy 2 jylda biz ınflıatsııany birtindep tómendetýdemiz jáne nysanaly dálizdi ustanamyz. Budan basqa, osy jyldan bastap Qazaqstan Ulttyq banki ınflıatsııanyń deńgeıin salystyrýǵa keletin damý deńgeıi bar elderdiń kórsetkishterine deıin jetkizý maqsatynda ınflıatsııa boıynsha nysanaly baǵdarlardy birtindep tómendete bastady. Eger 2017 jyly ınflıatsııa dálizi 6-8% bolsa, osy jyly 5-7% boldy, al 2019 jyly 4-6% bolady. Inflıatsııany 4% deńgeıge deıin jáne 2020 jyldyń sońynda odan da tómendetý ortasha merzimdegi mindet bolyp otyr», - dedi Danııar Aqyshev.
Bas bankır bul maqsat aıqyn dep atady.
«Máselen, qazanda jyldyq kórsetkish boıynsha ınflıatsııa 5,3%-ǵa deıin tómendedi. Inflıatsııanyń deńgeıi 18%-dyq mólsherde bolǵan kezde 3 jyl buryn bul mánderdi ekiniń biri boljaǵan joq», - dep túıindedi ol.
Aıta ketý kerek, búgin Almatyda Qazaqstan qarjygerleriniń VIII kongresi bastaldy. Mańyzdy jıyn tól teńgemizdiń dúnıege kelgenine 25 jyl tolýyna oraı uıymdastyrylyp otyr
