Danııar Aqyshev depýtattardyń usynysynan bas tartty
ASTANA. QazAqparat - Qazaqstandaǵy qurylys kompanııalarynyń kóbi paıdalanýǵa berilmeı jatyp-aq, salyp jatqan kópqabatty turǵyn úıdiń páterlerin úleskerlik tártippen satyp jiberetini belgili. Májilis depýtattary naqty osy másele elimizde jańa turǵyn úılerdiń jetispeýshiligin týdyryp, «7-20-25» baǵdarlamasynyń oryndalýyn shektep otyrǵanyn aıtyp dabyl qaǵýda, dep habarlaıdy QazAqparat tilshisi.
Aıta ketsek, buǵan deıin «Nur Otan» partııasy atynan birqatar májilismender (Sabılıanov, Aısına, Máken, Qurmanova, Mahambetov) Ulttyq bank tóraǵasyna usynys joldaǵan bolatyn. Olardyń aıtýynsha, «7-20-25» baǵdarlamasy boıynsha adamdar tek jańadan salynǵan baspanany tek salýshy kompanııalardan ǵana satyp ala alady.
Depýtattardyń paıymynsha, baǵdarlamany júzege asyrýdaǵy basty kedergi - osy talap.
«2017 jyldyń kórsetkishi boıynsha, jeke kompanııalar kópqabatty turǵyn úılerdiń qurylysyna 348 mlrd teńge ınvestıtsııa salǵan. Ol somanyń 188 mlrd teńgesi - úleskerlerdiń aqshasy. ıAǵnı, jańadan salynǵan kópqabatty turǵyn úı paıdalanýǵa berilmeı turyp-aq, sol úıdegi páterlerdiń jartysy jeke tulǵalarǵa satylyp ketedi. Bul jaǵdaı «7-20-25» baǵdarlamasy boıynsha azamattardyń baspana alý múmkindigin aıtarlyqtaı shekteıdi», - dedi depýtattar.
QR jyljymaıtyn múlik boıynsha agenttiginiń málimetteri boıynsha, úı salýshy kompanııalar páterlerdiń 80-90 paıyzyn paıdalanýǵa bermeı jatyp satyp jiberedi. Osydan baryp jańa úılerdiń jetispeýshiligi seziledi.
«Mine, sondyqtan baǵdarlamanyń salýshy kompanııalardan jańa baspanany satyp alý týraly talabyn - qaıtalama naryqta úleskerlerden baspanany satyp alý múmkindigimen tolyqtyrý kerek. Joǵaryda aıtylǵandardy eskere otyryp, Ulttyq bank Úkimetpen birlesip, úleskerlik qurylys negizinde úleskerler ıe bolǵan qaıtalama baspanany satyp alýǵa jol ashar tyń mehanızmdy qurýy kerek. Ol úıdiń qurylysynyń merzimi úsh jyldan aspaǵan bolýy tıis. Qaıtalama naryqtaǵy bul ózgeris halyqtyń basym bóligin baǵdarlamaǵa tartary anyq», - deıdi májilismender».
Májilis depýtattarynyń bul usynysyna Danııar Aqyshev kelesideı jaýap bergen.
«Úlestik qurylys satysynda turǵyn úıdi satyp alýǵa qarajaty bar bir azamattardyń «7-20-25» baǵdarlamasy boıynsha basqa azamattarǵa úıdi qaıta satý múmkindigin beretin tetikti engizý ádil emes dep esepteımiz. Sebebi, mámileni alypsatarlyq maqsatta júzege asyrýy múmkin azamattardyń belgili toby úshin bul - anyq artyqshylyqty jasaıdy. Sondyqtan Ulttyq bank bul usynysty qoldamaıdy», - delingen Danııar Aqyshevtyń jaýabynda.
Onyń jaýabyna súıensek, bolashaqta qurylys kompanııalarynyń kóbinese turǵyn úıdi paıdalanýǵa bergennen keıin satý tetigin yntalandyrý arqyly azamattardyń múddelerin qorǵaý boıynsha sharalar barynsha tıimdi bolmaq.
«Ulttyq bankbBaǵdarlamadan tys «Baspana Hıt» qosymsha ıpotekalyq ónimdi iske qosty. Onda qaıtalama turǵyn úıdi myna talaptarmen satyp alýdy nesıeleý kózdelgen: bastapqy jarna - turǵyn úı qunynan 20 paıyzdan bastap, qaryz merzimi -15 jylǵa deıin, nesıe boıynsha mólsherleme jyldyq 11,0 paıyzdy quraıdy (Ulttyq Banktiń bazalyq mólsherlemesi jáne 1,75 paıyz). Astana, Almaty, Aqtaý jáne Atyraý qalalary úshin satyp alynatyn turǵyn úıdiń eń joǵary quny 25 mln teńgeni, basqa óńirler úshin - 15 mln teńge bolady. Qosymsha ıpotekalyq ónim boıynsha turǵyn úı qaryzdaryn berýdi jýyq arada baǵdarlamaǵa qatysýshy bankter júzege asyratyn bolady», - deıdi Danııar Aqyshev.
