Danııar Aqyshev bankterdiń jumysyn qadaǵalaýdyń jańa modelin usyndy
«Ótken jyly Ulttyq bankke dáleldi paıym negizinde táýekelderdi qadaǵalaýǵa múmkindik beretin zańnamalyq baza ózgertildi. Shyndyǵynda, bankterdiń jumysyn qadaǵalaý paradıgmasy ózgerdi», - dedi Ulttyq bank tóraǵasy Memleket basshysynyń qatysýymen ótken Úkimettiń keńeıtilgen otyrysynda.
Danııar Aqyshev atap ótkendeı, buǵan deıin keıbir bankter baqylaýshynyń tekserisi aralyǵynda jumystaryn júrgizgen. ıAǵnı, tekserý jumystarynyń arasyndaǵy kezeńderde dáıeksiz esepter arqyly keıbir jaısyz jaǵdaılar aıtylmaı qalǵan.
«Endigi kezekte protsestiń negizi - turaqty túrde qashyqtyqtan baqylaý bolmaq. Atap aıtqanda, bıznes-modelderdi baǵalaý, korporatıvti basqarý, táýekelderdi, kapıtaldy, qarjylandyrýdy basqarý júıesi sekildi protsester qadaǵalanady. Osy protsesterdiń barlyǵy da táýekel dárejesine qaraı keshendi tekserýden ótedi», - dedi Danııar Aqyshev.
Onyń aıtýyna qaraǵanda, osyndaı monıtorıngtiń kómegimen banktiń ahýalyna turaqty túrde baqylaý júrgizilip otyrady. Teskeristiń nátıjesine qaraı, qatańdyǵy ártúrli dárejedegi, atap aıtqanda keńesterden bastap bank operatsııalaryn shekteýge deıingi sharalar qabyldanatyn bolady.
«Bul ádistemeni Ulttyq bank Rothschild ınvestıtsııalyq kompanııasymen jáne aýdıtorlyq PricewaterhouseCoopers kompanııasymen birge ázirledi», - dedi Danııar Aqyshev.
