Danııanyń premer-mınıstri Mette Frederıksen otstavkaǵa ketti
ASTANA. KAZINFORM – Danııanyń premer-mınıstri Mette Frederıksen parlamenttik saılaýdaǵy álsiz nátıjeden keıin qyzmetinen ketti, dep habarlaıdy BILD.
Bul sheshim jańa koalıtsııa qurý protsesin bastady, onyń quramynda ózi qaıtadan úkimet basshysy bolýy da múmkin.
24 naýryzda ótken saılaýda Frederıksenniń sotsıal-demokrattary aıtarlyqtaı jeńiliske ushyrady. Nátıje sońǵy júz jyldan bergi eń tómen kórsetkishterdiń biri boldy. Solshyl-tsentrıstik blok ońshyl lagerden alda bolǵanymen (179 orynnyń 84-i), 90 oryndyq absolıýtti kópshilikke jete almady.
Frederıksen saılaý nátıjesin «qabyldaýǵa bolady» dep baǵalap, elge turaqty úkimet qajet ekenin aıtty. Ol jaýapkershilikti óz moınyna alýǵa daıyn ekenin jetkizdi.
Koalıtsııalyq kelissózderde Moderaterne partııasy sheshýshi ról atqarýy múmkin. Bul partııany burynǵy premer-mınıstr, qazirgi syrtqy ister mınıstri Lars Lekke Rasmýssen basqarady. Olar 14 mandat alyp, bılik úshin tartysta negizgi faktorǵa aınaldy.
Ázirge Frederıksenniń úkimet qurý mandatyn alatyny belgisiz.
Otstavkadan keıin Danııa koroli Frederık X barlyq parlamenttik partııa jetekshilerimen «koroldik raýnd» aıasynda kezdesý ótkizedi. Bul protsedýra barysynda saıasatkerler bolashaq úkimet basshysyn kim retinde qoldaıtynyn bildiredi. Osydan keıin monarh koalıtsııa qurýǵa alǵashqy múmkindik beriletin tulǵany anyqtaıdy.
Aıta keteıik, bul Frederık X úshin 2024 jylǵy taqqa otyrǵannan bergi alǵashqy «koroldik raýnd» bolmaq.
Aıta ketelik Danııada parlament saılaýy ótip jatqany týraly jazǵan edik.
