Danııanyń premer-mınıstri Grenlandııaǵa bardy

ASTANA. KAZINFORM — Danııanyń premer-mınıstri Mette Frederıksen Grenlandııanyń astanasy Nýýk qalasyna baryp, Grenlandııa turǵyndarymen kezdesti. Bul týraly Anadolý jazdy.

Nýýkke jasaǵan sapary barysynda Frederıksen Grenlandııanyń premer-mınıstri Iens-Frederık Nılsenmen kezdesý ótkizdi, sodan keıin baspasózge arnalǵan málimdeme jasady.

Danııa úkimetiniń basshysy AQSh-pen baılanysty jaǵdaıdyń áli de kúrdeli ekenin atap ótip, «Qazir bizde synap kórýge bolatyn bir jol bar» dedi.

Danııa premer-mınıstri bul saparǵa Grenlandııaǵa Danııanyń qoldaýyn bildirý úshin kelgenin atap ótti.

«Men bul jaǵdaıdyń Grenlandııa halqy úshin qanshalyqty qıyn ekenin túsinemin. Búgin men ártúrli adamdarmen sóılestim, olardyń barlyǵy bir ǵana nárseni aıtty. Barlyq grenlandııalyqtar Danııanyń sózsiz, zor, uly ári shynaıy qoldaýyn sezinedi dep úmittenemin. Sondaı-aq Eýropanyń da Grenlandııany qoldap otyrǵanyn sezine alasyzdar», dedi Frederıksen.

Óz kezeginde Nılsen Grenlandııanyń Danııamen úılesimdi túrde áreket etip jatqanyn málimdedi.

Nýýktegi ombýdsmen rezıdentsııasynyń baǵynda túsirilgen, qar úıindileriniń ortasynda jýrnalıstermen sóılesip turǵan Mette Frederıksenniń fotosýreti buqaralyq aqparat quraldarynda úlken qyzyǵýshylyq týdyrdy.

Aıta keteıik, jýyrda Grenlandııa men Danııada myńdaǵan adam AQSh prezıdenti Donald Tramptyń Grenlandııany basyp alý josparyna narazylyq bildirip, kóshege shyqty.