Danııanyń poshta qyzmeti hat tasymaldaýdy toqtatady

ASTANA. KAZINFORM — Danııanyń memlekettik poshta qyzmeti PostNord 2025 jyldyń sońynda hat tasymaldaýdy toqtatady, dep habarlaıdy BBC.

Poshta bul sheshimin datchandyqtardyń hat jazýdy is júzinde doǵarǵanymen túsindiredi: ǵasyr basynan beri jiberiletin hattar sany 90%-ǵa qysqarǵan — 1,4 mıllıardtan ótken jyly 110 mıllıonǵa deıin azaıǵan. Eldegi bar 1500 poshta jáshigi osy jazda alyna bastaıdy.

Danııada hat jetkizý 1624 jyly bastalǵan. 400 jyl boıy, 2023 jyldyń sońyna deıin, elde ámbebap poshta qyzmeti jumys istep kelgen.

PostNord kompanııasy endi nazaryn sálemdemelerdi jetkizýge aýdaratynyn málimdedi, al bıyl nemese ótken jyly satyp alynǵan poshta markalaryn kelesi jyldyń ishinde qaıtaryp berýge bolady.

Kompanııa basshysy Kım Pedersenniń aıtýynsha, datchandyqtar tsıfrlyq tehnologııalardy kóbirek paıdalana bastaǵan — tek ótken jyldyń ózinde jiberilgen hattar sany 30%-ǵa azaıǵan. Dese de, shamamen 271 myń adam, kóbinese egde jastaǵylar, áli de qaǵaz hattardy jón kóredi.

Poshtashylardy da aýyr kezeń kútip tur: PostNord-tyń 4600 qyzmetkeriniń shamamen 1500-i jumysynan aıyrylady.

Buǵan deıin «Qazposhta» alǵash ret álemniń úzdik 50 poshta operatorlarynyń qataryna kirgenin habarlaǵan edik.