Danııada «Tımmı» atty kıttiń denesi jaǵaǵa shyǵaryldy
ASTANA. KAZINFORM — Danııanyń Anholt aralynda qaza tapqan «Tımmı» atty órkeshti kıttiń denesi jaǵalaýǵa shyǵaryldy, dep habarlaıdy euronews.
Birneshe aı boıy Germanııa jurtshylyǵynyń nazarynda bolǵan kıt naýryz aıynda Baltyq teńizinde baıqalǵan. Osydan keıin mamandar janýardy qutqarýǵa jáne ony Soltústik teńizge qaıtarýǵa birneshe ret áreket jasaǵan.
Mamyr aıynda qutqarýshylar kıtti barjamen tasymaldap, ashyq teńizge baǵyttaýǵa tyrysqan. Alaıda bul áreketter nátıje bermedi.
Keıin kıttiń óleksesi Danııa men Shvetsııa arasyndaǵy Kattegat buǵazyndaǵy Anholt araly mańynan tabyldy. Mamandardyń málimetinshe, ol eki aptaǵa jýyq taıaz sýda bolǵan.
Jarııalanǵan beınejazbadan jumysshylardyń kıttiń denesin jaǵalaýǵa tartyp shyǵaryp jatqanyn kórýge bolady. Oqıǵa ornyna kóptegen jergilikti turǵyndar, onyń ishinde balalar da jınalǵan.
Danııa bıligi kıttiń ólim sebebin anyqtaý úshin onyń denesine zertteý júrgiziletinin málimdedi.
Budan buryn Germanııada qutqarylǵan órkeshti kıt Tımmı jańa mekenge jol tartqanyn jazǵan edik.
